ەلىمىزدە اۋىل شارۋاشىلىعى ماقساتىنداعى جەردi ءتيىمدى پايدالانۋدى باقىلاۋ جۇمىسى كۇشەيتىلىپ, جۇيەلى جولعا ءتۇستى. بۇلاي دەپ كەشە وتكەن قر پرەزيدەنتى جانىنداعى ورتالىق كوممۋنيكاتسيالار قىزمەتىنىڭ بريفينگىندە اگروحيميالىق قىزمەت بويىنشا رەسپۋبليكالىق عىلىمي-ادىستەمەلىك ورتالىعىنىڭ باسشىسى ەربولات بازىلجانوۆ مالىمدەدى.
تاياۋدا اگروحيميالىق قىزمەتتىڭ ماتەريالدىق-تەحنيكالىق بازاسى نىعايتىلادى. قازىردىڭ وزىندە اتالمىش قىزمەتتىڭ كورسەتكىشتەرى كوڭىل كونشىتەرلىك. ماسەلەن, اگروحيميالىق زەرتتەۋ كولەمى 1,5 ملن گەكتاردان 3,5 ملن گەكتارعا دەيىن وسكەن. سونىڭ ىشىندە ەگىستىكتەگى كوڭنىڭ, جەڭىل گيدروليزدەنەتىن ازوتتىڭ, جىلجىمالى فوسفور مەن اۋىسپالى كاليدىڭ كورسەتكىشتەرى توپىراقتى اگروحيميالىق زەرتتەۋ ناتيجەسىندە انىقتالاتىن كورىنەدى. بۇل جۇمىس سۋارىلمايتىن جەردەگى ەگىستىكتە جەتى جىلدا ءبىر رەت جانە سۋارمالى جەردە بەس جىلدا ءبىر رەت جۇرگىزىلەدى.
ە.بازىلجانوۆتىڭ سوزىنشە, اۋىل شارۋاشىلىعى ماقساتىنداعى جەردى ءتيىمسىز پايدالانعاندار قاتاڭ جاۋاپكەرشىلىككە تارتىلادى. ءتىپتى, بۇل ءۇشىن جەر ولاردان تارتىپ الىنادى. جالپى, جەر يەلەرى مەن جەردى پايدالانۋشىلارعا جەردىڭ قۇنارلىعى مەن مەليوراتيۆتىك جاعدايىن تۇسىرمەۋ تالابى قويىلادى. بۇل تالاپ جەر كودەكسىنە وسىدان ءبىر جارىم جىل بۇرىن وزگەرىستەر مەن تولىقتىرۋلار ەنگىزىلگەندە كۇشەيتىلگەن.
سونداي-اق, اگروحيميالىق قىزمەت باسشىسى جەردى جالعا بەرۋ ءتارتىبىن ءتۇسىندىرىپ ءوتتى. ونىڭ سوزىنە سەنسەك, شەتەلدىكتەرگە جانە شەتەلدىك كومپانيالارعا جەردى جالعا بەرۋ ماسەلەسىن وبلىس اكىمدىكتەرى شەشەدى. اۋدان اكىمدەرىنىڭ بۇعان قۇقىعى جوق. ال, وبلىس اكىمدەرى ونداي شەشىمدى ورتالىق ورگاندارمەن كەلىسىپ شەشەدى جانە جالعا بەرۋ مەرزىمى 25 جىلدان اسپايدى.
«ەگەر جەردى پايدالانۋدا زاڭ بۇزۋشىلىقتار ورىن السا نەمەسە بەلگىلەنگەن ماقساتتا پايدالانباسا ءتيىستى شارالار قولدانىلادى. بۇل شارالار شەتەل ازاماتتارىنا دا, قازاقستان ازاماتتارىنا دا بىردەي جۇرەدى. الدىمەن ەسكەرتۋ جاسالادى, ودان كەيىن ايىپپۇل سالىنادى. ەگەر بۇدان كەيىن دە زاڭ بۇزۋشىلىقتار تيىلماسا, سوت ارقىلى جەر مەملەكەتكە قايتارىلادى» دەيدى ە.بازىلجانوۆ.
امانعالي قالجانوۆ
