استانا ەكونوميكالىق فورۋمى – ەۋرازيالىق كەڭىستىكتە جىل سايىن وتەتىن ۇلكەن حالىقارالىق جيىن. ەلوردادا ءار جىلى الەمدىك ەكونوميكالىق قوعامداستىقتىڭ وكىلدەرى, قازىرگى جانە بۇرىنعى مەملەكەت باسشىلارى, نوبەل سىيلىعىنىڭ لاۋرەاتتارى, الەمدەگى عىلىمي سالانىڭ ورگاندارى مەن بيزنەسمەندەرى وسى ايتۋلى جيىندا باس قوسادى. بيىلعى 25 مامىردا وتەتىن ىح استانا ەكونوميكالىق فورۋمى اياسىندا باسەكەلەستىك ماسەلەلەرىنە ارنالعان «باسەكەلەستىكتى ىلگەرلەتۋ: جاڭا «ويىن ەرەجەلەرى» اتتى سەسسيا وتكىزۋ جوسپارلانعان.
مەملەكەت باسشىسى ن.نازارباەۆتىڭ بەس ينستيتۋتسيونالدىق رەفورمانى جۇزەگە اسىرۋ جونىندەگى «ءجۇز ناقتى قادام» ۇلت جوسپارىندا مونوپولياعا قارسى قىزمەتتىڭ جۇمىس تۇجىرىمداماسىن وزگەرتۋ جانە ەىدۇ (ەكونوميكالىق ىنتىماقتاستىق جəنە دامۋ ۇيىمى) ستاندارتتارىنا سايكەس كەلتىرۋ كوزدەلگەنى بەلگىلى. بۇل 53-ءشى قادامدا قاراستىرىلعان. وسى قادامدى ىسكە اسىرۋ بارىسىندا قازاقستان رەسپۋبليكاسىنىڭ مونوپولياعا قارسى زاڭناماسىن ۇزدىك حالىقارالىق ءتاجىريبەگە جانە حالىقارالىق ستاندارتتارعا سايكەس كەلتىرۋ باعىتىندا جۇمىستار جۇرگىزىلۋدە. فورۋمدا وسى قادامنىڭ جاي-جاپسارى دا كەڭىنەن تالقىلاناتىن بولادى.
استانادا ەكى كۇن بويى وتەتىن بيىلعى ەكونوميكالىق فورۋمىنىڭ باستى تاقىرىبى «جاڭا ەكونوميكالىق شىنايىلىق: ءارتاراپتاندىرۋ, يننوۆاتسيالار جانە ءبىلىم ەكونوميكاسى» دەپ اتالادى. سونداي-اق, ەكونوميكالىق فورۋم شەڭبەرىندە باسەكەلەستىك ماسەلەلەرىنە قاتىستى ارنايى كەڭەس وتكىزىلەدى.
وتكەن جىلى 29-30 قازاندا پاريجدە ەىدۇ-نىڭ باسەكەلەستىك جونىندەگى جاھاندىق فورۋمنىڭ وتىرىسى وتكەن ەدى. ونىڭ ءبىر سەسسياسى ءبىزدىڭ ەلىمىزدەگى قۇقىق سالاسىنداعى باسەكەلەستىك زاڭناماسىنا جانە ساياساتىنا ساراپتامالىق شولۋ جاساۋعا ارنالعان بولاتىن. پىكىر بىلدىرگەن بىلىكتى ماماندار ەلىمىزدىڭ جەتىستىكتەرىن جان-جاقتى اتاپ ءوتتى. بيىل قازاقستان رەسپۋبليكاسىنىڭ مونوپولياعا قارسى رەتتەۋ قىزمەتىنىڭ قۇرىلعانىنا 25 جىل تولادى. مۇنى اتاپ ءوتۋ دە ماڭىزدى وقيعا بولىپ تابىلاتىنى ءسوزسىز.
بيىلعى استانا ەكونوميكالىق فورۋمىنىڭ ءبىرىنشى كۇنىن, ياعني 25 مامىرعا ەڭ نەگىزگى شارالار جوسپارلانىپ وتىر. سەسسيا باعدارلاماسىندا پرەمەر-ءمينيستردىڭ ءبىرىنشى ورىنباسارى ب.ساعىنتاەۆتىڭ, ەىدۇ-نىڭ باسەكەلەستىك جونىندەگى كوميتەتىنىڭ توراعاسى فرەدەريك جەننيدىڭ جانە الەمنىڭ جەتەكشى مونوپولياعا قارسى ورگاندارى وكىلدەرى باياندامالار جاسايدى. سونداي-اق, سەسسياعا قاتىسۋشىلار ەىدۇ-نىڭ ستاندارتتارىنا جانە ۇزدىك حالىقارالىق تاجىريبەگە سايكەس كەلتىرۋ ماقساتىندا قازاقستان رەسپۋبليكاسىنىڭ مونوپولياعا قارسى زاڭناماسىنا ەنگىزىلگەن سوڭعى ءوزگەرىستەرمەن تانىسادى. بۇل سەسسيانىڭ نەگىزگى ماقساتى – قازاقستان رەسپۋبليكاسىنىڭ قازىرگى زامانعى ەكونوميكالىق ساياساتىن دامىتۋداعى مونوپولياعا قارسى رەتتەۋ مەن باسەكەلەستىكتى قورعاۋدىڭ ءرولىن جانە ونى ودان ءارى دامىتۋ جولدارىن ايقىنداپ كورسەتۋ. سونىڭ نەگىزىندە بولاشاق باعدار بەلگىلەنەدى.
مەڭدوللا نۇرىمۇلى
