استانا قالاسىنداعى №1 قالالىق اۋرۋحانادا دۇنيەجۇزىلىك برونحيالدى استمامەن كۇرەس كۇنىنە ورايلاستىرىلعان اشىق ەسىك كۇنى ۇيىمداستىرىلدى.
ەلوردانىڭ ەمدەۋ مەكەمەلەرىندە ءۇش جىلدان بەرى وتكىزىلىپ كەلە جاتقان شارا بارىسىندا استانالىق پۋلمونولوگتار مەن اللەرگولوگتار ايتۋلى اۋرۋمەن سىرقاتتاناتىن پاتسيەنتتەرگە, سونداي-اق برونحيالدى استماعا شالدىقتىم دەپ ويلايتىن ادامدارعا تەگىن كەڭەستەر بەردى. جىل سايىن دەمىكپەمەن اۋىراتىن قالا تۇرعىندارى دارىگەرلەردەن اۋرۋ مەن ونى ەمدەۋ جولدارى تۋرالى قاجەتتى اقپارات الادى.
– بۇل شارا ارقىلى حالىقتىڭ بارلىق توپتارىن قامتۋعا تىرىسامىز, ءبىزدىڭ باستى مىندەتىمىز – اۋرۋدىڭ الدىن الۋ. كەيبىر پاتسيەنتتەردە برونحيالدى استما ەمەس, اللەرگيالىق اۋرۋ نەمەسە دەمىكپەگە اۋىساتىن استما كەزدەسەدى. سوندىقتان پروفيلاكتيكا جۇرگىزۋ كەرەك. مۇنىمەن قوسا, شارا بارىسىندا ناۋقاستارعا اتالعان اۋرۋعا شالدىققاندا ءوزىن-ءوزى قالاي ۇستانۋ كەرەگى تۋرالى اقپارات بەرىلەدى. نەگىزىنەن, دارىگەرگە ۋاقىتىلى جۇگىنىپ, بارلىق كەڭەستەردى ساقتاعان جاعدايدا, استمانى رەتتەۋگە بولادى, – دەدى استانا قالاسىنىڭ سالاۋاتتى ءومىر سالتىن قالىپتاستىرۋ ورتالىعىنىڭ ديرەكتورى اقمارال قۇرمانباەۆا.
كەشەگى وتكەن شارا بارىسىندا 80 جۋىق ادام كونسۋلتاتسيالار مەن جولدامالار الدى. دارىگەرلەر برونحيالدى استمانىڭ قازىرگى زامانعى دياگنوستيكاسى جانە ەمدەۋ ادىستەرى جايلى ايتىپ بەردى. ماماندار كەڭەس الۋعا كەلۋشىلەردى اۋرۋدىڭ الدىن الۋ ءۇشىن ءبىرىنشى كەزەكتە دەنە شىنىقتىرۋمەن اينالىسۋعا, سالاۋاتتى ءومىر سالتىن ۇستانۋعا جانە دۇرىس تاماقتانۋعا شاقىردى.
