بىلتىر كۇزدە مۇلىكتى زاڭداستىرۋعا قاتىستى زاڭعا وزگەرتۋلەر مەن تولىقتىرۋلار ەنگىزىلگەننەن كەيىن زاڭداستىرۋ ناۋقانى جاڭا قارقىن الدى. ماسەلەن, وتكەن جىلدىڭ 1 جەلتوقسانىنان كەيىن بەس اي ىشىندە 794 ملرد تەڭگە جاريا ەتىلگەن. بۇل ناۋقان باستاۋ العالى جاريا بولعان جالپى سومانىڭ ۇشتەن ەكى بولىگىن قۇرايدى. بۇلاي دەپ سەيسەنبى كۇنى سەلەكتورلىق رەجيمدە وتكەن ۇكىمەت وتىرىسىندا قر قارجى ءمينيسترى باقىت سۇلتانوۆ مالىمدەدى.
ونىڭ ايتۋىنشا, مۇلىكتى زاڭداستىرۋدىڭ مۇمكىندىكتەرىن وسى كۇندەرگە دەيىن 86 مىڭعا جۋىق ازامات پايدالانعان. سونىڭ ناتيجەسىندە ناۋقان بارىسىندا ەلىمىز بويىنشا 1,4 ترلن تەڭگەنىڭ مۇلكىن زاڭداستىرۋعا ءوتىنىش بەرىلگەن. ونىڭ 1,2 ترلن تەڭگەگە جاقىنى جاريا ەتىلدى.
قر ۇلتتىق بانك توراعاسى دانيار اقىشەۆتىڭ مالىمدەۋىنشە, مۇلىكتى زاڭداستىرۋ ناۋقانىنا 30 بانك پەن «قازپوشتا» اق قاتىسىپ وتىر. ناۋقان باستالعالى بانكتەردە 910 ەسەپشوت اشىلىپ, ولارعا 590,3 ملرد تەڭگە سالىندى. سونىڭ ىشىندە ارنايى ەسەپشوتتاعى قارجىنىڭ 83 پايىزى اعىمداعى جىلدىڭ ءتورت ايىندا جاريا ەتىلدى. بۇل كورسەتكىش تە زاڭداستىرۋ ناۋقانىنىڭ سەرپىن العانىن ايعاقتايدى.
استانا قالاسىنا كەلسەك, ەلوردادا اعىمداعى جىلدىڭ ءساۋىر ايىنىڭ اياعىنا دەيىن 26 350 987 تەڭگەنىڭ 5740 نىسانى جانە 130 325 445 تەڭگە مولشەرىندەگى قارجى زاڭداستىرىلدى.
استانانىڭ جەرگىلىكتى اتقارۋشى ورگاندارىنداعى كوميسسيالارعا ەل اۋماعىندا ورنالاسقان مۇلىكتى زاڭداستىرۋ بويىنشا 6276 ءوتىنىش كەلىپ تۇسكەن. ولاردىڭ اراسىندا تۇرعىن, تۇرعىن ەمەس جانە كوممەرتسيالىق 5740 نىساندى زاڭداستىرۋ ماقۇلداندى.
سونىمەن قاتار, استانا قالاسىنىڭ مەملەكەتتىك كىرىستەر دەپارتامەنتى ورگاندارىنا ەل اۋماعىنان تىس ورنالاسقان 57 608 مىڭ تەڭگەلىك ءتورت جانە قۇنى 1 012 432 مىڭ تەڭگەلىك 11 نىسان بويىنشا التى ارنايى دەكلاراتسيا تاپسىرىلعان. مەملەكەتتەن تىس جەردەگى قۇنى 6243 مىڭ تەڭگەلىك زاڭدى تۇلعالار قاتىساتىن ەكى ۇلەسى زاڭداستىرىلدى.
سونداي-اق, قالالىق مەملەكەتتىك كىرىستەر ورگاندارىنا جالپى سوماسى 130 325 445 مىڭ تەڭگەنى قۇرايتىن اقشانى زاڭداستىرۋ بويىنشا 72 ءوتىنىش كەلىپ ءتۇسىپ, 8110 مىڭ تەڭگەگە تارتاتىن قۇندى قاعازدار زاڭداستىرىلدى.
امانعالي قالجانوۆ
