كەشە استانا قالالىق ءماسليحاتىنىڭ قۇرىلىس, ەكولوگيا, كولىك جانە تۇرعىن ءۇي-كوممۋنالدىق شارۋاشىلىق ماسەلەلەرى جونىندەگى تۇراقتى كوميسسيا وتىرىسىندا قالادا سىرتقى (ۆيزۋالدى) جارنامانى ورنالاستىرۋ ءتارتىبى جانە شارتتارى قارالىپ, پيك قىزمەتىن جەتىلدىرۋ ماسەلەسى قوزعالدى.
كۇن تارتىبىندەگى العاشقى ماسەلە بويىنشا ەلوردانىڭ ساۋلەت جانە قالا قۇرىلىسى باسقارماسى باسشىسىنىڭ مىندەتىن اتقارۋشى قايرات قوجامجاروۆ بايانداما جاسادى.
ونىڭ ايتۋىنشا, بيىل جىل باسىنان بەرى مامىر ايىنا دەيىن نىساندار ماڭدايشاسىنداعى 170 جازۋ بويىنشا ماسەلە قارالىپ, ءتيىستى كەلىسىمدەر جاسالدى. ال 130 ادام ۇسىنعان سىرتقى جارنامالار ءتيىستى ەرەجەگە سايكەس كەلمەگەندىكتەن كەرى قايتارىلدى.
بۇعان قوسا, رۇقسات الماستان جارناما ورنالاستىرىپ, قاتەلىكتەردى جىبەرگەندەرگە 250 ەسكەرتۋ حات جىبەرىلدى. سونىڭ ىشىندە 121 جارناما نىسانىن يەلەرى ءوز كۇشىمەن جويدى. ال استانانىڭ ىشكى ىستەر دەپارتامەنتى وسى ماسەلەگە قاتىستى اكىمشىلىك قۇقىق بۇزۋشىلىق تۋرالى 20 حاتتامانى تولتىردى.
سىرتقى جارنامانىڭ قازاق تىلىندەگى ماتىنىندە كوبىنەسە قاتە كەتەتىنى بارشامىزعا بەلگىلى. ماسەلەن, بىلتىر سىرتقى جارناما جانە كورنەكى اقپارات بويىنشا 2354 ەسكيز جوباسى ساراپتامادان وتكىزىلىپ, جارناما ماتىندەرىندەگى 1510 قاتە تۇزەتىلدى. ال بيىلعى ءبىرىنشى توقساندا سىرتقى جارناما جانە كورنەكى اقپارات بويىنشا 451 ەسكيز ساراپتامادان ءوتىپ, جارناما ماتىندەرىنىڭ 220 قاتەسى تۇزەتىلدى. سونداي-اق, سىرتقى (كورنەكى) جارناماداعى زاڭ بۇزۋشىلىقتار بويىنشا قالا اكىمدىگىنىڭ سايتىنداعى «وتىنىشتەردى قابىلداۋدىڭ بىرىڭعاي جۇيەسى» ارنايى ايدارىنا قالا تۇرعىندارىنان جىل باسىنان بەرى 25 ءوتىنىش كەلىپ ءتۇستى.
ەكىنشى ماسەلە بويىنشا قالالىق تۇرعىن ءۇي ينسپەكتسياسى باسقارماسىنىڭ باسشىسى ءاليحان قۋاتبەكوۆتىڭ جاساعان بايانداماسىنان ۇققانىمىز, پيك قىزمەتىن جەتىلدىرۋ بويىنشا اتقارىلاتىن ءىس شاش ەتەكتەن. وزدەرى قارايتىن ۇيلەردىڭ اۋلالارىن كۇتىپ-ۇستاۋدان باستاپ جۇمىستارىنىڭ اشىقتىعىن قامتاماسىز ەتۋگە دەيىن ىستەلەتىن ءبىراز شارۋا بار. ءاليحان جۇماحانۇلىنىڭ ايتۋىنشا, اشىقتىقتى قامتاماسىز ەتۋ بويىنشا ءبىراز ىلگەرىلەۋ بار. ماسەلەن, بىلتىردان بەرى قولدانىلعان شارالاردىڭ ناتيجەسىندە قازىر ءار توقسان سايىن تۇرعىندارعا ەسەپ بەرەتىن پيك-تەر مەن قىزمەت كورسەتۋشى ۇيىمداردىڭ سانى 70 پايىزعا جەتتى. ال وزگەلەر بويىنشا ءتيىستى شارالار قولدانىلادى.
امانعالي
قالجانوۆ
