استانالىق بوكسشى دانيار ەلەۋسىنوۆ كاسىپقوي بوكستاعى جەتىنشى جەڭىسىنە قول جەتكىزدى.
وليمپيادا ويىندارىنىڭ, الەم جانە ازيا چەمپيونى اتاعىنىڭ يەگەرى دانيار ەلەۋسىنوۆ كاسىپقوي بوكسقا اۋىسقالى جەتى جەكپە-جەك وتكىزىپ ۇلگەردى. ازىرگە اتاقتى بوكسشىمىز جەڭىلىسسىز كەلەدى.
وتكەن جەكسەنبىدە جەرلەسىمىز اقش-تىڭ مەريلەند شتاتىندا چيلي بوكسشىسى لۋيس نورامبۋەنامەن شايقاستى. جەكپە-جەك سەگىز راۋندقا جالعاستى. وتە تارتىستى ايقاستى باعالاعان تورەشىلەر القاسى قازاقستاندىق بوكسشىنىڭ ۇپاي سانىمەن جەڭىسكە جەتكەنىن ءبىراۋىزدان ماقۇلدادى. وسىلايشا وزىندىك تەحنيكاسىمەن ەرەكشەلەنەتىن ەلەۋسىنوۆ جەتىنشى جەڭىسىنە قول جەتكىزدى.
وسى جەڭىستەن كەيىن ەلەۋسىنوۆتىڭ مەنەدجەرى «دانياردىڭ ەندىگى جەكپە-جەگى كەزەكتى ايماقتىق تيتۋل ءۇشىن تەحاستا وتەتىن بولادى. سودان كەيىن ول جارتىلاي ورتا سالماقتاعى ءبىر چەمپيوندىق تيتۋلعا تالاسۋعا مۇمكىندىك الادى. ول جەكپە-جەكتى قازاقستاندا, بوكسشىنىڭ ەلىندە وتكىزۋدى ويلاستىرۋدامىز» دەپ ءمالىم ەتتى.
ال وتكەن جىلى بارلىق چەمپيوندىق اتاقتارىنان ايىرىلىپ قالعان گەننادي گولوۆكين بولسا شارشى الاڭعا قايتا ورالاتىن بولىپ وتىر. اتاقتى GGG 8 ماۋسىم كۇنى «مەديسون سكۆەر گاردەن» كەشەنىندە امەريكالىق سيۆ روللسپەن قولعاپ تۇيىستىرەتىن بولادى.
ايتپاقشى, وسىدان ءبىراز بۇرىن گولوۆكين مەن ەلەۋسىنوۆ اراسىندا داۋ-داماي تۋىنداپ, ول جانكۇيەرلەر تاراپىنان قىزۋ تالقىعا تۇسكەن بولاتىن. ونىڭ باستى سەبەبى, 8 ماۋسىمدا وتەتىن گولوۆكيننىڭ جەكپە-جەگىنىڭ كاردىندا ەلەۋسىنوۆ تە ايقاساتىنى الدىن الا كەلىسىلگەن ەكەن. بىراق اياق استىنان الەمنىڭ ەكس-چەمپيونى بوكس كەشىندە ەلەۋسىنوۆ بولمايدى دەپ جاريالادى. سودان ەكەۋارا ءسوزتالاس تۋىنداپ العان ەدى. ءسويتىپ, ەكى اتاقتى بوكسشىمىزدىڭ باسى ءبىر شارشى الاڭدا تۇيىسپەيتىن بولدى.
