جوعالعان زاتتاردى تاۋىپ بەرەدى

استانا قالاسى ىشكى ىستەر دەپارتامەنتىنە قاراستى اقپاراتتىق-اناليتيكالىق ورتالىق جانىنان تابىلعان زاتتار بيۋروسى اشىلدى. بۇدان بىلاي ەلوردالىق ازاماتتار جولشىباي جوعالتىپ العان قۇجاتتارىن سول مەكەمەدەن تابۋىنا بولادى.

بيۋرو قىزمەتكەرلەرىنىڭ نەگىزگى قىزمەتى – زاڭدى جانە جەكە تۇلعالاردىڭ جوعالعان قۇجاتتارى مەن زاتتارىن قابىلداۋ, تىركەۋ, بەرۋ جانە ساقتاۋ.

ءاربىر كەلىپ تۇسكەن قۇجاتتار مەن زاتتار تىركەۋ جۋرنالىنا جازىلادى. سودان كەيىن ارناۋلى سەيفتە ساقتالادى. قۇجات يەلەرىن تەز ارادا انىقتاۋ ءۇشىن تابىلعان زاتتاردىڭ دەرەكتەمەلەرى اقپاراتتىق قامتاماسىز ەتۋ بولىمىنە جولدانادى ەكەن.

تابىلعان زاتتار بيۋروسىنىڭ وپەراتورى انار حابايدىڭ ايتۋىنشا, بۇگىندە ەلۋدەن استام ادامنىڭ قۇجاتى تابىلعان. ولاردىڭ ىشىندە ءتۇرلى سەنىمحاتتار, اسكەري بيلەت, ديپ­لوم, ساقتاندىرۋ كارتاسى, بانك ەسەپشوتى, اتتەستات, تۇرعىن ۇيگە تىركەۋ كىتابى, جەكە كۋالىك پەن پاسپورت, جۇرگىزۋشى كۋالىگى, پاتەر قۇجاتى, ساتۋ-ساتىپ الۋ كەلىسىمى, نەكە كۋالىگى بار. ءتىپتى, قايرات ەسىمدى ازاماتتىڭ وننان استام قۇجاتى وسىندا جاتىر ەكەن.

«تابىلعان زاتتار بيۋروسىنا راديو­اك­تيۆ­تىك جانە جارىلعىش زاتتار, اسەرى كۇشتى ۋلاردى, قارۋ جاراق پەن وق-دارىلەردى ساقتاۋ ءۇشىن قابىلداۋعا تىيىم سالىنادى. استانا قالاسى اۋماعىنان تابىلعان قۇجاتتار ءتىزىمى دەپارتامەنتتىڭ ەلەكتروندى سايتىندا دا جاريالانادى. بيۋرو جۇيەلى تۇردە جاڭار­تى­لىپ وتىرادى» دەيدى وپەراتور انار حاباي.

قۇجاتتاردىڭ ساقتالۋ مەرزىمىنە كەلسەك, بيۋروعا تۇسكەن كۇننەن باستاپ ءبىر جىل. ال, تىركەۋ جۋرنالىنىڭ ساقتالۋ مەرزىمى ءۇش جىلدى قۇرايدى. تابىلعان قۇجاتتار مەن زاتتاردى قايتارۋ مەنشىك يەسىنىڭ جازباشا ءوتىنىشى نەگىزىندە جۇرگىزىلەدى. وتىنىشتە تابىلعان زات يەسىنىڭ وسى زاتقا قۇقىن راستايتىن بەلگىلەرى مەن باسقا دا قاجەتتى مالىمەتتەر كورسەتىلەدى.

ەندى قۇجاتىن جوعالتقان كەز كەلگەن ازامات ساۋران كوشەسى 7-ءۇي مەكەنجايىندا ورنالاسقان تابىلعان زاتتار بيۋروسىنىڭ 71-60-32 بايلانىس تەلەفونىنا حابارلاسىپ, قۇجاتىنىڭ بار-جوقتىعىن بىلە الادى.