سىمبات مىرزاعۇلوۆ, استانا قالاسى جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى:
– قالاداعى جول جوندەۋ جۇمىستارى قالاي ءجۇرىپ جاتىر؟
– استانا – ءسات سايىن دامىپ كەلە جاتقان قالالاردىڭ ءبىرى. سوعان ساي, قالانىڭ جول-كولىك قوزعالىسى دا جەتىلىپ وتىرۋ كەرەك. استاناداعى جولداردىڭ بەتكى قاباتىنداعى ۇساق اقاۋلار بۇتىندەلىپ, ولاردىڭ الدى الىنىپ جاتىر. ورتاشا جوندەۋ جۇمىستارىندا ەسكىرگەن جەرلەر قالىپقا كەلتىرىلىپ, جولدىڭ بەتكى قاباتى تەگىستەلۋدە, سونداي-اق, جەر پولوتنوسىنىڭ زاقىمدانعان جەرلەرى جوندەلەدى. جول جابىندارىنىڭ جوندەۋ ارالىعىنا جول سالىنىپ, پايدالانۋعا بەرىلگەننەن كەيىن باستالىپ, جاڭارتىلىپ, كۇردەلى جوندەۋدەن وتكىزىلىپ نەمەسە ورتاشا جوندەۋدى قاجەت ەتكەنشە, جولعا كوبىنە كەزەكتى ورتاشا جوندەۋ جۇمىستارى جۇرگىزىلە بەرەدى.
– بيىل قانشا كوشەنى جوندەۋ جوسپارلانعان؟
– ەلوردادا 2008-2013 جىلدار ارالىعىندا 189,2 كم جول سالىندى. 87,8 كم جول قايتا جوندەلدى. 3 كولىكتىك جولايرىق جانە 4 كوپىر مەن جولوتكەل سالىندى. اعىمداعى جىلى 17 كوشەگە ورتاشا جوندەۋ جۇمىستارى جۇرگىزىلەدى. 100-دەن استام كوشەگە جەڭىل-جەلپى جوندەۋ جۇمىستارىن جۇرگىزۋ جوسپارلانعان. بۇگىندە ورتاشا جوندەۋ جۇمىستارى بويىنشا 10 كوشە جوندەلىپ ءبىتتى.
– جوندەۋ جۇمىستارى قاي كوشەلەردە جۇرگىزىلەدى؟
– بەيبىتشىلىك كوشەسىنىڭ كەنەسارى كوشەسىنەن اباي داڭعىلىنا دەيىنگى; ءۋاليحانوۆ كوشەسىنىڭ باراەۆ كوشەسىنەن بوگەنباي باتىر داڭعىلىنا دەيىنگى; پۋشكين كوشەسىنىڭ تاۋەلسىزدىك داڭعىلىنان №56 كوشەگە دەيىنگى; باراەۆ كوشەسىنىڭ جاياۋ جۇرگىنشىلەر كوپىرىنەن ءۋاليحانوۆ كوشەسىنە دەيىنگى; قورعالجىن تاس جولىنىڭ قابانباي باتىر داڭعىلىنان تۇران داڭعىلىنا دەيىنگى; ورىنبور كوشەسىنىڭ №23 كوشەدەن قوناەۆ كوشەسىنە دەيىنگى; كەنەسارى كوشەسىنىڭ جەلتوقسان كوشەسىنەن رەسپۋبليكا داڭعىلىنا دەيىنگى; ەسەنبەرلين كوشەسىنىڭ جەڭىس داڭعىلىنان كوپىرگە دەيىنگى بولىگى, تاعى باسقا كوشەلەر جوندەلدى. كونستيتۋتسيا كوشەسىندە كوپىردەن قارتالى كوشەسىنە دەيىنگى, ى.دۇكەنۇلى كوشەسىندە جوندەۋ جۇمىستارى جۇرگىزىلەدى. جىلدىڭ ەكىنشى جارتىسىندا باباتايۇلى كوشەسىندە, يمانوۆ جانە ميرزويان كوشەلەرىنىڭ ارالىعىندا كوپىردىڭ جولىنا, گولف كلۋبقا اپاراتىن جولعا ورتاشا جوندەۋ جۇمىستارى جۇرگىزىلەدى. سونىمەن قاتار, تولستوي كوشەسىنىڭ سەمبينوۆ كوشەسىنەن ءالىمجانوۆ كوشەسىنە دەيىنگى, سەمبينوۆ كوشەسىنىڭ كەنەسارى كوشەسىنەن سەيفۋللين كوشەسىنە دەيىنگى بولىگى جوندەلەدى.
سونىمەن قاتار, كوشە جولدارىن جوندەۋ تەك ورتالىق كوشەلەردە جۇرگىزىلىپ قانا قويمايدى, قالانىڭ شەتكەرى جاقتارىندا دا, ماسەلەن: ەڭلىك-كەبەك, جولىمبەت, ءوندىرىس, بەيسەكوۆا, دۋلاتوۆ, گەرتسەن, قورداي جانە تاعى باسقا كوشەلەردە جۇرگىزىلدى.
