ەندى قولايسىز اۋا رايىندا الىس جولعا شىققاندار جازاعا تارتىلادى.
ەلىمىزدە اۋا رايىنىڭ قولايسىزدىعىنا قاراماستان, قىستا قالادان شىعاتىن ازاماتتاردى اكىمشىلىك جاۋاپكەرشىلىككە تارتۋ تۋرالى ماسەلە قارالىپ جاتىر. بۇل تۋرالى نۇر-سۇلتان قالاسى بويىنشا توتەنشە جاعدايلار دەپارتامەنتى توتەنشە جاعدايلاردى جويۋ باسقارماسىنىڭ باسشىسى ەلدور رايىمبەكوۆ مالىمدەدى.
– قازىرگى ۋاقىتتا ءبىز «قازاۆتوجول» جانە «قازاقاۆتوجولمەن» بىرلەسىپ, قولايسىز اۋا رايى جاعدايلارى تۋرالى ەسكەرتۋلەرگە نازار اۋدارماي, قىسقى ۋاقىتتا قالادان شىعاتىن تۇرعىنداردى جاۋاپكەرشىلىككە تارتۋ مۇمكىندىگىن قاراستىرىپ جاتىرمىز. اۋا رايىنىڭ قولايسىزدىعى مەن ەسكەرتۋلەردى ەلەمەي جولعا شىعاتىندار بار. سونىڭ ناتيجەسىندە ول ادامدار توتەنشە جاعدايعا تاپ بولادى. ياعني جول قىزمەتىنىڭ قىزمەتكەرلەرى بوران كۇندەرى شىققان اۆتوكولىكتەردىڭ يەلەرى تۋرالى حابارلايتىن بولادى, ودان كەيىن ءتارتىپ ساقشىلارى مۇنداي ازاماتتاردى اكىمشىلىك جاۋاپكەرشىلىككە تارتادى. بۇل جەردە باستى ماسەلە – ادامداردىڭ قاۋىپسىزدىگى, – دەدى ە.رايىمبەكوۆ.
ونىڭ ايتۋىنشا, زاڭنامادا مۇنداي جاۋاپكەرشىلىك قاراستىرىلعان. سوندىقتان ەسكەرتۋلەرگە نازار اۋدارمايتىن جۇرگىزۋشىلەردى جاۋاپكەرشىلىككە تارتۋ ءۇشىن شارالار قابىلدانادى.
