ۇلتتىق كىتاپحانانىڭ سىرتقى باسپالداعىندا تىزىلگەن ورىندىقتار پايدا بولدى. بۇل كومپوزيتسيا كىتاپحانا ماڭىنان وتكەن كەز كەلگەن ادامنىڭ نازارىن وزىنە اۋدارماي قويمايدى.
كىتاپحانا باسپالداعىنا قويىلعان ەسكى ورىندىقتار از ۋاقىتتىڭ ىشىندە كوپشىلىكتىڭ ەستەلىك سۋرەتكە تۇسۋگە ارنالعان ورنىنا اينالىپ شىعا كەلدى. بىراق ەلوردالىقتار مەن قالا قوناقتارى بۇل كورىنىستى ءارتۇرلى قابىلداپ ءجۇر. ولاردىڭ كەيبىرى بۇل تىڭ يدەياعا تامسانا قاراسا, ەندى ءبىرى پسيحولوگيالىق تۇرعىدان جامان اسەرگە بولەنگەنىن ايتادى. جالپى, جۇمباق ينستاللياتسيانىڭ سىرى نەدە؟ مامانداردىڭ پىكىرىنە قۇلاق تۇرەلىك.
كومپوزيتسيا اۆتورى, بەلگىلى سۋرەتشى, ونەر قايراتكەرى اسحات احمەدياروۆتىڭ ايتۋىنشا, بۇل – ونىڭ كوپتەن بەرى جاساۋعا قۇمارتىپ جۇرگەن تۋىندىسى. ول بۇرىننان بيىك باسپالداقتى ارت-نىسانعا اينالدىرۋدى ويعا العان ەكەن. ال مۇنداي مۇمكىندىك وعان ۇلتتىق كىتاپحانا عيماراتىنان بۇيىرعان.
«كومپوزيتسيانىڭ فيلوسوفيالىق ءمانى بار. ال ورىندىقتاردى گاراجداردان تاپتىم. ولاردىڭ كەيبىرى ابدەن ەسكىرگەن. جالپى, قويىلعان ورىندىقتار ءارتۇرلى. بۇل قوعامداعى ءار ادامنىڭ كوزقاراسىنىڭ دا ءارتۇرلى ەكەنىن ءبىلدىرىپ تۇر. وسى باسپالداققا بۇرىننان كوزىم ءتۇسىپ, قاشان ماعان وسىنداي ينستاللياتسيا جاساۋعا مۇمكىندىك بەرەتىنىن كۇتىپ جۇرگەنمىن. مۇنداي ءساتتىڭ تۋى – مەن ءۇشىن ۇلكەن مارتەبە. ۇيىمداستىرۋشىلار دا ويىمداعى دۇنيەنى جاساۋعا ەرىك بەردى» دەيدى اۆتور.
ال كىتاپحانانىڭ اقپاراتتىق-مادەني باعدارلامالار قىزمەتىنىڭ جەتەكشىسى نۇرحان سەركەبايدىڭ ايتۋىنشا, بۇل كومپوزيتسيا 23-24 تامىز كۇندەرى وتكەن «استانانىڭ مادەني ءماتىنى» حالىقارالىق عىلىمي-تانىمدىق كونفەرەنتسياسى اياسىندا جاسالعان.
اۆتوردىڭ ۇسىنىسى بويىنشا كىتاپحاناعا بارشا ادامنىڭ نازارىن اۋدارۋ, وقىرمان تارتۋ ماقساتىندا جاسالعان جۇمىس ەكەن. «ارينە, ۇلتتىق كىتاپحانا وقىرمانعا كەندە ەمەس, دەگەنمەن مۇندا بۇكىل قالا جۇرتى كەلەدى دەپ ايتا المايمىز. ال سۋرەتشىنىڭ وسى تۋىندىسى كوپشىلىكتىڭ نازارىن اۋدارىپ جاتىر» دەيدى ول.
