استانانىڭ 20 جىلدىعىنا وراي ەلورداداعى «قازانات» اتشابارىندا «التىن جەبە» حالىقارالىق ءتۋرنيرى جالاۋىن جەلبىرەتتى. استانادا وسىمەن ەكىنشى مارتە تۋ كوتەرگەن بايراقتى باسەكەدە وڭتۇستىك افريكا, رەسەي, رۋمىنيا جانە قازاقستان سىندى 11 مەملەكەتتىڭ قۇرالايدى كوزگە اتقان 25 مەرگەنى باق سىنادى.
قر ۇلتتىق سپورت قاۋىمداستىعىنىڭ پرەزيدەنتى بەكبولات تىلەۋحان مەن وڭتۇستىك كورەيا رەسپۋبليكاسىنداعى دۇنيەجۇزىلىك ات ۇستىنەن ساداق اتۋ فەدەراتسياسىنىڭ پرەزيدەنتى كيم يۋنگ سۋپ ءىى «التىن جەبە» حالىقارالىق ءتۋرنيرىنىڭ سالتاناتتى اشىلۋىن ۇلتتىق ساداقپەن نىسانا اتۋدان باستادى. كونستيتۋتسيا مەرەكەسىنە تۇسپا-تۇس كەلگەن جارىستىڭ سالتاناتتى اشىلۋىنا قاتىسقان قازاقستانداعى تۇركيا, جاپونيا, رۋمىنيا, وڭتۇستىك كورەيا ەلشىلىكتەرىنىڭ وكىلدەرى قالىڭ كوپشىلىكتى ايتۋلى مەرەكەمەن قۇتتىقتاپ, سپورتشىلارعا ساتتىلىك تىلەدى. سونداي-اق, جارىستىڭ اشىلۋى كەزىندە جينالعاندار قاتىسۋشى مەرگەندەردىڭ سالتاناتتى شەرۋىن, ۇلتتىق ويىن كورىنىستەرىن تاماشالادى.
«ازيالىق ستيل», «تۇرىك ءستيلى» جانە «قازاق ءستيلى», ياعني جامبى اتۋ بويىنشا باسەكەگە تۇسكەن سۇرمەرگەندەر قالىڭ جانكۇيەردى ونەرلەرىمەن ءتانتى ەتتى. اسىرەسە, رۋمىنيالىق, ۆەنگريالىق, گەرمانيالىق, وڭتۇستىك افريكالىق مەرگەندەر ات ۇستىنەن ساداق اتۋدىڭ سان قيلى شەبەرلىگىن كورسەتىپ, قۇيعىتا شاپقان بويى قاس-قاعىمدا بىرنەشە جەبەنى ءبىر نىساناعا ءدال قاداپ, كورەرمەندى تاڭداندىرماي قويمادى.
ايتا كەتۋ كەرەك, قازاق ەلىنىڭ نامىسىن قورعاعان تالعات ومارباەۆ, ەلدوس باداشەۆ, ابزال تۋلىبەكوۆ, ەرالحان ايكوز, ايتبەك سارىباي جانە ءاليا كامالوۆا مەن راميشا ديداروۆا ەسىمدى جەتى مەرگەن بايراقتى باسەكەدە جانكۇيەردى جەرگە قاراتپادى. ءۇش كەزەڭدە دە ۇپاي سانىنان ەشكىمگە ەسە جىبەرمەگەن ولار ەل ابىرويىن اسقاقتاتتى.
ەكى كۇنگە سوزىلعان جارىستىڭ جالپى ءۇش كەزەڭىنىڭ قورىتىندىسى بويىنشا ەڭ جوعارى, ياعني 169,65 ۇپاي جيناعان رۋمىننىڭ سۇرمەرگەنى ميحاي كوزمەي جامبى اتۋدان ەكىنشى مارتە چەمپيون اتانىپ, «التىن جەبە» كۋبوگى مەن 1 ملن 800 مىڭ تەڭگەنىڭ سىيلىعىن قانجىعالادى. ايتا كەتۋ كەرەك, اتالمىش ءتۋرنيردىڭ ەكى دۇركىن چەمپيونى اتانعان رۋمىنيالىق مەرگەن بۇعان دەيىن ات ۇستىنەن ساداق اتۋدان 2014 جىلى الەم چەمپيونى, بىلتىر ەۋروپا چەمپيونى بولعان.
ال جامبى اتۋ سايىسىندا ميحايدان كەم ونەر كورسەتپەگەن جەرلەسىمىز ەرالحان ايكوز وتكەن جىلى ءدال وسى جارىستا ءۇشىنشى ورىندى قاناعات تۇتسا, بيىلعى باسەكەدە ءبىر ساتى جوعارىلاپ, 145,97 ۇپايمەن ەكىنشى ورىنعا قول جەتكىزدى. كۇمىس جۇلدەگەرگە 1 ملن تەڭگە تابىس ەتىلدى.
ءۇش ستيل بويىنشا دا جۇلدەگە ىلىكپەگەنىمەن, جيىنى 134,67 ۇپاي جيناعان ابزال تۋلىبەككە ءۇشىنشى ورىن بۇيىردى. ءتورتىنشى ورىندى 129,86 ۇپايمەن موڭعول سۇرمەرگەنى ەردەنەسۋفت ەردەنە, بەسىنشى ورىندى 122,49 ۇپايمەن تۇركيالىق الكان يبراھيم الپەرەن يەلەندى. بۇل جەڭىمپازدار دا قارجىلاي سىيلىققا يە بولدى. جالپى جۇلدە قورى 4 ملن تەڭگەنى قۇرادى.
