يندونەزيانىڭ جاكارتا جانە پالەمبانگ قالالارىندا سالتانات قۇرعان ازيا ويىندارى مارەسىنە جەتتى.
قازاقستان جالپى كوماندالىق ەسەپتە 76 جۇلدە ەنشىلەپ, 9-ورىنعا تۇراقتادى. بۇل – تاۋەلسىز ەل بولعالى ۇلتتىق قۇرامانىڭ ازيا ويىندارىنداعى ەڭ تومەنگى كورسەتكىشى. بۇعان دەيىنگى التى ازيادادا ۇزدىك بەستىكتىڭ قاتارىنان كورىنگەن.
مەدال سانى بۇرىنعى مەجەمىزگە جەتەقابىل بولدى. بىراق ەل قورجىنى قومپايىپ كورىنگەنىمەن, التىننىڭ سالماعى از تارتىپ, اۋىرلاي قويمادى. ستاتيستيكانى كەلتىرسەك, 1994 جىلى 77 جۇلدەنىڭ 25-ءى – التىن, 1998 جىلى 80-ءنىڭ 26-سى – التىن, 2002 جىلى 76-نىڭ 20-سى – التىن, 2006 جىلى 85-ءتىڭ 23-ءى – التىن, 2010 جىلى 79-دىڭ 18-ءى – التىن جانە 2014 جىلى 84 مەدالدىڭ 24-ءى – التىن. وسى ناتيجەمەن بەستىك باعادان كەم تۇسپەگەن.
ال بۇل جولعى ازياداداعى 76-نىڭ تەك 15-ءى عانا التىن تارتتى. قالعان 17-ءسى – كۇمىس, 44-ءى – قولا. جۇلدەنىڭ جارتىسىنان كوبى قولادان قۇرالىپ, قۇرامامىز 9-ورىنعا ءبىر-اق قۇلادى. ەسەسىنە قولا سانى بويىنشا 2002 جىلعى ءوز رەكوردىمىز (42) جاڭاردى.
كەزەكتى بايراقتى باسەكەدە, ادەتتەگىدەي, كوشتى قىتاي باستادى. ەكىنشى ورىنعا جاپونيا جايعاسسا, ۇشتىكتى كورەيا ءتۇيىندەدى. ءتورتىنشى ورىنعا جارىس قوجايىندارى يندونەزيا تابان تىرەپ, بەستىككە وزبەكستان كوتەرىلدى.
ۇلتتىق قۇراما ۇپايدان نەگە شاشاۋ شىعاردى؟ نەگە ۇلت نامىسىنا بالانعان بوكسشىلاردىڭ باعى جانبادى؟ بۇل تۋرالى گازەتىمىزدىڭ الداعى سانىندا كەڭىنەن تارقاتىپ جازامىز.
