Астана
Тұңғыш Президент кітапханасында «Мәңгілік ел идеясы: тарихы мен болашағы» атты республикалық ғылыми конференция өтті. Жиынға отандық ғалымдар, докторанттар мен магистранттар қатысты. Шара соңында олар «Қазақстан жолы: мәңгілік ел» монографиясын шығаруға уағдаласты.
Алматы
Алматыға қалаішілік жолаушы тасымалдауға арналған 200 жаңа автобус әкелінді. Сыйымдылығы үлкен жаңа автобустар №12, 19, 56, 70, 77, 123, 124, 137 маршруттары бойынша жүреді.
Шымкент
Шымкентте «Қазпоштаның» цифрлы кеңсесі ашылды. Мұнда тек 2 кеңесші ғана азаматтарға көмек көрсетеді. Қалған қызметтердің барлығы автоматтандырылған.
Шығыс Қазақстан облысы
Үржар ауданында «Тарбағатай» мемлекеттік ұлттық табиғи саябағы ашылды. Жаңа саябақ 6 түрлі кластерлік жер телімдерінен тұрады. Оның ерекшелігі, мұнда өсімдіктердің өзге аумақта кездеспейтін Қызыл кітапқа енген 35-тен аса түрі бар.
Батыс Қазақстан облысы
Х.Бөкеева атындағы облыстық қазақ драма театрында «Мұқағали, Нұрғиса» драмасы сахналанды. Оқиға қазақтың біртуар тұлғалары – композитор Нұрғиса Тілендиев пен ақын Мұқағали Мақатаевтың арасында өрбиді. Спектакль ақынның композиторға аманаттап кеткен «Есіңе мені алғайсың» өлеңіне ән жазумен түйінделеді.
Маңғыстау облысы
Ақтауда қоқыстарды сұрыптап салуға арналған жәшіктер қойылуда. 4 жәшіктің бірі шыныға, екіншісі пластик бұйымдар мен қағаздарға, соңғы екеуі тұрмыстық қалдықтарға арналған. Мұндай жәшіктер қазіргі уақытта 8-шағын аудандағы 5 үйдің жанына орнатылды.
Түркістан облысы
Түркістанда қала күні мерекесі аталып өтті. Халықаралық түркі әлемінің форумына келген Түркия, Үндістан, Өзбекстан, Болгария, Иран, Ресей, Дағыстан елдерінің әдебиетшілері мен ақын-жазушылары қала күніне арналған мерекелік шарасына арнайы қатысты.
Атырау облысы
Қайырымдылық айлығына орай Қайыршақты ауылдық округінің әкімдігі мен кәсіпкер Асылбек Сұлтанов өңірдегі қарттар мен мүмкіндігі шектеулі жандарға арнайы ас берді. Дастарқаннан дәм татқан 80-нен аса қонақ шараны ұйымдастырушыларға алғыстарын айтты.
