Кеше елордадағы Қазақстан Республикасының Тұңғыш Президенті – Елбасы кітапханасында «Азаматтық қоғам және мемлекет» атты тақырыпта VIII қалалық форум өтті. Форум жұмысына Астана қаласының әкімі Бақыт Сұлтанов қатысты.
Бұл форумда мемлекеттік органдар мен үкіметтік емес ұйымдар үшін тиімді сұхбат алаңы өрбіп, азаматтық секторды дамытудың өзекті мәселелері талқыланды.
Жиында қала басшысы сегізінші рет өтіп отырған форумның маңызына салмақ салып сөйледі.
– Бұл басқосудың негізгі мақсаты елордадағы азаматтық қоғамды дамыту бағытында атқарылған жұмыстарды ортаға салып, талқылау болмақ. Сонымен қатар, Елбасымыздың Қазақстан халқына Жолдауында айтылған әлеуметтік бастамаларды іске асырудағы бірлескен іс-қимылымыздың негізгі басымдықтарын айқындау.
Бүгінде елорда әкімдігі мен 30-дан астам үкіметтік емес ұйымдар бірлесіп, 463 миллион теңгеге 66 әлеуметтік маңызы бар жобаларды жүзеге асырды. Мемлекеттік бағдарламаларды іске асыруда үкіметтік емес ұйымдар қоғамдық пікірді ескере отырып, жұмыс істеу мүмкіндігін туғызды. Мысалы, «Астана – адалдық алаңы» жобасы аясында Білім басқармасы мен оған қарасты мекемелердің қызметіне ҮЕҰ өкілдері мен ата-аналар қауымдастығы бақылау іс-шараларын қолға алды. Сондай-ақ, «Қарсы» жастар ұйымымен жастар арасындағы сыбайлас жемқорлыққа қарсы тәрбие жұмыстары қолға алынып, мектептердегі келеңсіз жағдайларға байланысты сауалнама жүргізілді. Қазір қаламызда 80-ге жуық жастар ұйымдары тіркелсе, солардың 30-ы қаладағы қоғамдық-саяси, мәдени шараларға белсенді атсалысады. Қысқасы, үкіметтік емес ұйымдар әлеуметтік, экономикалық, құқықтық мазмұндағы мәселелерді шешуде мемлекеттік органдардың сенімді серіктесі екенін айтқым келеді, – деді елорда әкімі.
ҚР Қоғамдық даму министрі Дархан Калетаев өз сөзінде бас шаһарда азаматтық бастамалар орталығының құрылысы басталғанын жеткізді. «Қазір әлеуметтік кәсіпкерлікті дамытуға арналған жобалар қолға алынды. Осы мақсатта арнайы сала мамандарын шақырып коучер оқытылады. Және еліміздің барлық аймағында әлеуметтік жобалардың карталары жасалады» деді министр. Сонымен қатар, Дархан Калетаев алдағы 27-28 қарашада республикалық азаматтық форум өтетінін хабарлады. Форум барысында сұхбат алаңында 4 секциялық шара ұйымдастырылып, үкіметтік емес ұйымдардың ең үздік әлеуметтік жобасы марапатталды.
