Астықты аймақтың тартуы
Кеше «ЭКСПО-2017» халықаралық мамандандырылған көрмесінің аясында Ақмола облысының Астана қаласындағы мәдени күндерінің ашылу салтанаты өтті. Қаланың орталық алаңында өткен шара барысында аталмыш облыс басшысы Мәлік Мырзалин сөз сөйлеп, астықты аймақтың үздік шығармашылық ұжымдары өнер көрсетті. Облыс күндерінің ашылуына орай өткен концертті астана әкімі әсет исекешев тамашалады.
Астанаға іргелес жатқан өңірдің бас қаладағы мәдени күндері 25 маусымға дейін жалғасады. Бүгіннен бастап жексенбіге дейін «Этноауыл» ұлттық-мәдени кешенінде Көкшетау қаласы мен Шортанды, Бурабай, Қорғалжын аудандарының қолөнер шеберлері мен «Блэк» ЖШС шеберлері ұлттық нақыштағы бұйымдарын таныстырып, шеберлік сабақтарын өткізеді. Ал облыс өнерпаздары «Дала сыры» атты концерт қояды.
23 маусымда «Жеңіс» саябағында «Ақмола жұлдыздары» гала-концерті өтіп, суретшілер мен қолөнер шеберлерінің көрмесі ұйымдастырылады. Сол күні «Этноауыл» амфитеатрында Ақмола облыстық орыс драма театры Мұхтар Шахановтың шығармасының желісімен «Шыңғысхан» рок-операсын, Ш.Құсайынов атындағы Ақмола облыстық қазақ музыкалық драма театры «Жастар» сарайында Шахмет Құсайыновтың «Анамның ақ көйлегі» драмасын қояды.
24 маусымда Ш.Құсайынов атындағы Ақмола облыстық қазақ музыкалық драма театры «Этноауыл» амфитеатрында көрермендерге «Көкше әуендері» концерттік бағдарламасын ұсынады. Ақмола облыстық орыс драма театры 25 маусымға дейін М.Горький атындағы мемлекеттік академиялық орыс драма театрында балаларға арнап «Бремен музыканттары» спектаклін, 22 маусымда А.Островскийдің «Жасаусыз қалыңдық» караоке-мелодрамасын, 23 маусым күні М.Әуезовтің «Қарагөз» трагедиясын, 24 маусымда П.Морозованың музыкалық феериясы бойынша «Алқызыл желкендер» қойылымын және 25 маусымда Е.Шварцтың «Аждаһа» трагифарсымен облыс күндерін түйіндейді.
Аманғали Қалжанов