Бие сүті – бизнес көзі
Нұр-Сұлтан қаласында бие сүтінен жасалған диеталық шоколадтың дәмін татуға арналған шара өтті. Жаңадан нарыққа шыққан отандық өнімдердің үгіт-насихатын күшейтіп, экономикалық маңызы зор жобалардың жолын ашу, шаруашылықты шалқытуға дем беру мақсатында өткізілген бұл шараға «Ғылым қоры» АҚ басшылары, «ULYTAU» өндіріс кәсіпорны және бизнес өкілдері қатысты.
Ұлт жоспарының 64-қадамын жүзеге асыру аясында 2015 жылдың соңында «Ғылыми және ғылыми-техникалық қызмет нәтижелерін коммерцияландыру туралы» ҚР заңы қабылданған болатын. Қазіргі таңда 2016, 2017 және 2018 жылдары өткізілген конкурстардың нәтижелері бойынша «Ғылым қоры» АҚ-тың коммерцияландыруы бойынша 153 жоба жүзеге асырылған. Бие сүтінен жасалған диеталық шоколад та осы жоба аясында нарыққа шыққан өнімдердің бірі. Бүгінде «ULYTAU» деген атпен нарыққа шыққан бұл шоколадтың 9 түрі өндіріледі.
Шоколад «Қазақ тағамтану академиясы ҚҰ» ЖШС-те өндірілген. Тәулігіне 50 кг шоколад өндіретін бұл цехта бие сүтінен йогурт, балмұздақ және балалар тағамдарын да өндіреді. Аталған өнімдер құрамында қант мүлдем жоқтығымен және адам денесіне пайдалы дәрумендердің молдығымен ерекшеленеді. Бие сүтінен жасалған тағамдар – әлемдік аренадағы жаңа өнім, бұрын бие сүтінен тек қымыз ғана жасалса, Төрегелді Шарманов бастаған мамандарымыз «Ұлытау» зауытын ашып, бие сүтінен неше түрлі өнім өндіруді бастады.