Бірыңғай жиынтық төлем
Барлық қазақстандықтардың Міндетті әлеуметтік медициналық сақтандыруға (МӘМС) қатысып, әлеуметтік төлемдерді алуға мүмкіндігін арттыру үшін Еңбек және халықты әлеуметтік қорғау министрлігі өзін-өзі жұмыспен қамтитын азаматтарға Бірыңғай жиынтық төлем (БЖТ) енгізуді ұсынуда.
Құзырлы ведомство салықтық, әкімшілік-құқықтық шаралар кешенін қарастыратын заң жобасын дайындап, биыл қыркүйек айында Мәжіліске ұсынбақ. Бұл туралы Үкімет отырысында Еңбек және халықты әлеуметтік қорғау министрінің орынбасары Нұржан Әлтаев хабарлады.
Оның пайымдауынша, бірыңғай жиынтық төлемді енгізу тіркеу жұмыстарын оңайлатуға және салық мөлшерлемесін жеңілдетуге жол ашады, МӘМС шеңберінде медициналық қызметтерді алуға, міндетті әлеуметтік сақтандыру жүйесінен әлеуметтік төлемдерді тағайындауға мүмкіндік береді. Министрліктің жоспарлағанындай, БЖТ-ның мөлшері қала тұрғындары үшін бір айлық есептік көрсеткішті, ауыл тұрғындарына 0,5 айлық есептік көрсеткішті құрайды. Осылайша, түскен ақшаның 10 пайызы – жеке табыс салығына, 20 пайызы – мемлекеттік міндетті әлеуметтік сақтандыру қорына, 30 пайызы – зейнетақы төлемдеріне және 40 пайызы Міндетті әлеуметтік медициналық сақтандыру қорына аударылады. Еңбек және халықты әлеуметтік қорғау министрлігінің болжамы бойынша, БЖТ-ны енгізу нәтижесінде еліміздегі 500 мыңнан аса өзін-өзі жұмыспен қамтамасыз етушілер көлеңкеден шығады.