Елордадағы №77 «Қошақан» балалар бақшасының тәрбиеленушілері «Таза ойын» марафонына қатысты. Кішкентай эко-белсенділер эко-сайқымазақтармен бірге қызықты ойындарға атсалысып, қоқысты сұрыптап жинау, қоршаған ортаны таза ұстау бойынша сабақ алды.
Квестің алғашқы кезеңінде бүлдіршіндер қатты тұрмыстық қалдықтарды сұрыптап жинау дағдысымен танысты. Бұл кезеңде марафон қатысушыларына қоқыстың өңдеуге байланысты ақпараттар берілді. Ал екінші кезеңде кішкентай эко-белсенділер табиғатты аялаудың, оны ластамаудың маңызы жөніндегі мәліметтерге қанықты. Бүлдіршіндерге әсіресе «Қоқыспен күресу, табиғат және адам» деп аталатын ертегі қатты ұнады. Сонымен қатар олар есте сақтау қабілеті мен логиканы жетілдіруге, сын тұрғысынан ойлауға үйрететін ойындарды ойнады.
Марафон соңында кішкентай эко-белсенділерді шара ұйымдастырушылары алғыс хаттармен марапаттады. Дәл осындай форматтағы эко-квест қаладағы барлық білім беру мекемелерінде ұйымдастырылмақ.
