Елорда және Елбасы
Ғасырдың ең жас астанасы атанған елорданың Алатау бауырынан Сарыарқа сауырына көш түзеуінің 20 жылдығына арналған шаралар көптеп ұйымдастырылды. Салтанатты шаралардың бірқатарына Елбасы Нұрсұлтан Назарбаевтың өзі қатысты.
Айтулы күнге орайластырылған салтанатты жиынның бірінде Қазақстан Президенті жаңа елорданың іргесін қалауға үлес қосқан азаматтармен кездесті. Сондай-ақ, Мемлекет басшысы ЭКСПО конгресс-орталығы ғимаратында елорданың Астана қаласына көшуінің 20 жылдығына арналған «Президент және Астана» атты фотокөрмені аралап көрді.
Жиналған жұрт алдында Нұрсұлтан Назарбаев сөз сөйлеп, алғашқы жылдардың естеліктерімен бөлісті.
– 1997 жылы өз Жарлығыммен Ақмоланы еліміздің елордасы ретінде жариялаған едім. Мінекей, содан бері 20 жыл болды. 9 желтоқсанда түнгі сағат 00.30-да Әділбек Жақсыбековті ескі офисіме шақырдым. Оған «Сен ертеңнен бастап осы қаланың әкімі боласың» деп айттым. Осылайша, ол еліміздің жаңа астанасының тұңғыш әкімі атанды. Менің айналамда тұрғандар – бейнетінің зейнетін көріп отырған жандар. Олар менің жадымда, астаналықтардың жадында қашан да алғашқылардың бірі болып қалады. Себебі елорданың алғашқы кірпішін қалап, маңызды деген ғимараттарын тұрғызған – осы кісілер. Бұл азаматтарға қошемет көрсетіп, зор денсаулық пен бар игі жақсылықты тілейік, ағайын! – деді Мемлекет басшысы.
Елбасы фотокөрме жұмысымен танысқан соң, шетелдік және отандық эстрада жұлдыздарының қатысуымен өткен концертті тамашалады.