«Нұр Отан» партиясының Алматы аудандық филиалы қалалық №7 емханада Қазақстан халқы ассамблеясы жылына орай еліміздегі ұлтаралық татулық пен бірлікті насихаттау мақсатында этномәдени бірлестік өкілдерімен кездесу ұйымдастырды.
Кездесуді бастауыш партия ұйымының төрайымы Айгүл Қуанышева ашып, басқосудың мақсат-мүдделеріне тоқталды.
Бұдан кейін қалалық Корей этномәдени бірлестігі төрағасының орынбасары Р.Пак сөз алып, еліміздегі тыныштық пен татулық, ұлтаралық келісімнің салтанат құруы болашаққа сенімділікті молайта түсетінін айтып, корей мәдени бірлестігінің басқа этноорталықтармен тығыз қарым-қатынаста жұмыс жүргізіп келе жатқанын айтты.
Кездесуде «Нұр Отан» партиясы Алматы аудандық филиалы саяси кеңесінің мүшесі Бибігүл Ысқақова шараны ұйымдастырып отырған емхана ұжымына алғыс білдіре отырып, еліміздегі поляк халқының тұрмыс-тіршілігіне, өткен тарихына қысқаша шолу жасады. Айта кетсек, Бибігүл Қадырқызы Польша Республикасының еңбек сіңірген қайраткері, бұл атақты ол қазақ-
поляк қарым-қатынасына сіңірген еңбегі үшін кезінде Польша президенті Лех Качинскийдің өз қолынан алған. Бала кезінен еліміздегі поляктардың арасында өскен ол поляктардың мәдениетімен жете таныс.
Бүгінгі таңда жастар тәрбиесіне көңіл бөлу жайы қалай? Балабақша, мектеп, институт қабырғасында болашақ өрендерге отансүйгіштік рухын сіңіріп, олардың толыққанды білімді де мәдениетті, салиқалы азамат болып, еліне, халқына қызмет етуіне жағдай жасалып отыр ма? Осы негізде атқарылып жатқан жұмыстар қандай? Басқосуға жиналғандар осы төңіректегі ой-пікірлерін ортаға салды.
Жұма ҒАЗИЕВ
