«Южный» және «Рассвет» гараж кооперативінің «жыры» бітпей жатқанына 10 жылдан асты. Жуырда қалалық мәслихат депутаты Сәрсенбек Жүнісов аталмыш гараж иелерімен екі рет кездесіп, түйткілдерін тыңдады. Депутат құрылыс салушы мен жауапты органдарға шығып, анық-қанығын тұрғындарға жеткізді.
Бұл гараждар ысырылып жатыр екен. Алайда иелері өтемақы ала алмай отыр. Сондай-ақ, тұрғындар ысырылу кестесі қайта-қайта өзгере берген соң, аумақтың толығымен босайтын уақытын біле алмай, дал болған. Оның үстіне, бұл жер қоқыс тастайтын орынға айналып кеткен. Маңайда біреудің мүлкін ұрлау жағдайлары да жиілеген.
Тұрғындар аталмыш жер теліміне құрылыс салушының белгіленгенін немесе белгіленбегенін білу, өтемақы қашан төлене бастайтынын анықтау үшін мәслихатқа шағымданды. Сәрсенбек
Жүнісов мұның бәрін анықтап берді.
Белгілі болғандай, құрылыс салушыға гараждарды ысыруды, өтемақы төлеуді жалғастыру үшін алдында қалалық әкімдікпен жасалған келісімшартты созу керек. Депутат бұл қағаздарға қыркүйек айында қол қойылатынын жеткізді.
«Бүгінгі күні құрылыс салушыны ауыстыру қиын тиеді. Себебі ол 15 мыңға жуық гаражды сатып алып үлгерген. Әкімдікке ол үшін осыншама гаражды құрылыс салушыдан сатып алу керек болады. Тиісті фирма өзін жақсы жағынан көрсеткендіктен, осы күнге дейін алаяқтыққа бармағандықтан, әкімдік онымен келісімшартты созу шешіміне келді» деді С.Жүнісов гараж иелеріне. Бұған қоса, ысыруды жылдамдату мақсатында аумақтың бір бөлігі тағы бір ірі құрылыс компаниясына беріледі.
Жер телімдерін игеру бірнеше кезеңді қамтиды. Бүгіндері құрылыстың жобасы әзірленіп, бекітілген. Бірінші кезектегі құрылыс биыл Оқушылар сарайы артында басталады. Екінші және үшінші кезектегі жобалау мен құрылыс 2019 және 2020 жылдары қолға алынады. Гараждарды алу тұрақты түрде жүргізіледі. Бұл үдеріс иелерімен келісу негізінде және инвестор бекіткен бағамен жүреді. Осы баға қазіргі күнге 2 млн теңгеден асады.
Сәрсенбек Жүнісовтің сөзінше, бұл аумақта мемлекет мұқтаждығы үшін үш жер телімі қарастырылған. Бұл жер телімдерінде 1200 орынға арналған мектеп салынады.
«Бұл ауданға кемінде екі мектеп керек. Егер осы жерде қазір тұрғын үй кешенінің құрылысы басталса, әкімдік өз тарапынан аумақты мектептің құрылысы үшін игере бастайды. Біз гараждар аумағының мүмкіндігінше жылдам игерілуіне мүдделіміз» деді депутат. Гараж иелері болса жағдайдың созылып кетпеуіне, өтемақы көлемі бойынша келісімге келетініне үмітті.
