Ауа райының қолайсыздығына байланысты қаланың коммуналдық қызметтері аудан әкімдіктерімен бірлесіп күшейтілген режимде жұмыс істеп жатыр.
Елордада ұйытқып соққан қатты жел құрылыстарға зиян келтіріп, ағаштарды құлатып, белгілерді жұлып әкетті. Екпіні 15-20 м/с болатын оңтүстік-батыс желінің күшеюі, кей тұстарда 23 м/с болды. Бүгінде апаттың салдарын жою және қалпына келтіру жұмысын жүргізіп жатыр.
Боран соққан күні астанада 10 өрт оқиғасы, 12 авариялық-құтқару жұмысы тіркелді.
Алматы ауданында сол күні 8 жол белгісі, 1 жарықтандыру бағанасы, 5 шам, қоршау және т.б. бүлінсе, Байқоңыр ауданында ауа райының қолайсыздығы кезінде 7 автобус аялдамасы опырылып, 6 қоршау зақымдалды. 6 ағаш құлады. Ал Сарыарқа ауданында екі қабатты үйдің шатыры бұзылып, «Школьная» мекемесінің электр энергиясы үзілді. Астана-АЭК арқылы электрмен жабдықтау толығымен қалпына келтірілді.
«MEGA Silk Way» сауда орталығының негізгі кіреберісінің жанындағы көшеде қатты желден жарнамалық баннер жұлынып, әйел адамның үстіне түсті. Ол №2 ауруханаға жеткізілді. Дәрігерлер тексергеннен кейін үйіне жіберілді, жағдайы жақсы.
Нұра ауданында «Evolution» ТК, «Техникум» ТК құрылыс алаңдарында, Сығанақ-Әнет баба көшелерінің қиылысында, Қабанбай батыр даңғылы, 29/4, Қорғалжын тас жолы, 20Б, Омаров көшесі, 21/1 және Тұран даңғылы, 57/1 мекенжайларында қоршауларды қалпына келтіру жұмысы жүргізіліп жатыр.
