Elorda mäslihatynyŋ kezekten tys sessiiasynda qalalyq Otyn-energetika keşenı jäne kommunaldyq şaruaşylyq basqarmasynyŋ basşysy Marsel Ūzaqbaev Astana qalasynyŋ 2030 jylǧa deiıngı jylumen jabdyqtaudyŋ shemasyna engen özgerıstermen tanystyrdy.
– 2019 jyldyŋ 25 jeltoqsanynda qalalyq mäslihat qalany jylumen jabdyqtaudyŋ shemasyn bekıttı. Soǧan säikes 1-JEO, 2-JEO jäne qūrylysy jürıp jatqan 3-JEO qalaǧa jylu beretın közderı bolyp bekıtıldı. Bıraq qala halqynyŋ artuyna jäne şahardyŋ qarqyndy qūrylysyna bailanysty būl shema jaŋa audandardy qamtymaityn boldy, – dedı basqarma basşysy.
Onyŋ aituynşa, kelesı jyly jylu tapşylyǧy qazır salynyp jatqan nysandardy eseptemegende 350 gigokalorii bolady. Aldaǧy üş jyl ışınde tapşylyq 900 gigokaloriiaǧa ösedı. Būl mäselenı şeşu üşın gazben jūmys ısteitın üş stansa jobasy jüzege asyrylyp jatyr. Onyŋ bırı Syǧanaq köşesınıŋ oŋtüstıgı men Tūran daŋǧylynyŋ batysyn qamtityn «Tūran» atalatyn stansa saǧatyna 600 gigokalorii öndıredı. «Telman» stansasynyŋ quaty da tura osyndai. Būl «Telman» tūrǧyn alaby men Täuelsızdık daŋǧylyn qamtidy. Al «Oŋtüstık şyǧys» stansasynyŋ quaty saǧatyna 350 gigokalorii bolady. Ol «Myŋjyldyq» alleiasy, «Nūrly jol» vokzaly aumaǧyn, «Baǧystan» atalatyn jaŋa tūrǧyn alapqa jylu beredı. Osy üş stansanyŋ jalpy quaty – 1550 gigokalorii. 2023 jyly qalaǧa qosymşa 370 gigokalorii keltıru josparlanǧan. Qalǧan quat 2024 jäne 2025 jyldary jetkızıledı.
Qalalyq mäslihat deputaty Azamat Aithojin şahardy gazdandyru, kögıldır otyndy üilerge tartu mäselelerın köterdı. Mäslihat hatşysy Erlan Kanalimov äleumettık äljuaz sanatyndaǧy azamattarǧa gazdandyru boiynşa jeŋıldıkter turaly Jūmyspen qamtu jäne äleumettık qorǧau basqarmasy tarapynan az aqparat berıletının aita kele, osy jūmysty küşeitu kerektıgın aityp öttı.
Jiynǧa qatysqan qala äkımınıŋ orynbasary Eset Baiken audandardyŋ äkımdıkterı men jauapty basqarmalar tiıstı aqparattyq jūmysty naşar jürgızıp jatqanymen kelıse otyryp, syn oryndy ekenın aitty. Alda tüsındıru jūmystaryn küşeitu kerektıgın tapsyrdy.
– Qala äkımı apparattyq jiynda kemınde tūrǧyndardyŋ 70 paiyzyna gaz qosuǧa tapsyrma berdı. Būl maqsatqa jetuımız kerek. Audandardyŋ äkımdıkterı gazdandyrudy jedeldetu qajet, al bız öz tarapymyzdan aqparattyq qoldaumen qamtamasyz etemız, – dedı Eset Baiken.
Mäslihat deputaty Nūrdäulet Orazhanov avtonomdy jylu jüiesıne qosylǧan «Arabi» tūrǧyn üi keşenınıŋ tūrǧyndary dizel tapşylyǧy bolmai ma degen alaŋdauşylyq bıldırgenın aitty. Oǧan Otyn-energetika keşenı jäne kommunaldyq şaruaşylyq basqarmasynyŋ basşysy Marsel Ūzaqbaev mäsele baqylauda ekenın jetkızdı. Deputat Almat Jünısov «Kirpichnyi» jäne «Kazgorodok» tūrǧyn alaptarynyŋ infraqūrylymy mäselelerın köterdı.
