Astana qalasynyŋ Tılderdı damytu jäne arhiv ısı basqarmasynyŋ qoldauymen «Qara şaŋyraq» qoǧamdyq bırlestıgınıŋ ūiymdastyruymen elordada jas otbasylar arasyndaǧy «Qazaǧymnyŋ dästürlerı-ai» atty qalalyq saiysynyŋ üzdıkterı anyqtaldy.
Qalalyq saiys Astana qalasynyŋ jäne oǧan ırgeles auyldardyŋ aumaǧynda tūratyn, şaŋyraq kötergenderıne 1-5 jyl aralyǧyndaǧy jas otbasylardyŋ arasynda ötkızıldı. Oǧan qatysuǧa 30-ǧa juyq otbasydan ötınım tüsken. Baiqau şartyna säikes 9 otbasy ırıktep alyndy. Baiqau bır şaŋyraq astynda berekelı ömır sürudıŋ maŋyzyn arttyru, qazaq halqynyŋ salt-dästürlerın, ädet-ǧūryptaryn zamanǧa sai jaŋǧyrtyp, jastar arasynda nasihattau, otbasy institutynyŋ märtebesın köteru, ırgesın nyǧaitu, dästürlı otbasylyq qūndylyqtardy jastar arasynda därıpteuge baǧyttaldy. Ülgılı otbasylar baiqauy şynymen de elımızde janūia qūndylyqtarynyŋ rölın arttyryp, otbasy men nekenıŋ oŋ imidjın därıpteidı.
Saiystyŋ qazylar alqasynyŋ qūramynda memleket jäne qoǧam qairatkerı Darhan Myŋbai, elımızdıŋ eŋbek sıŋırgen qairatkerı, publisist Säule Meşıtbaiqyzy, tarihşy, «Qara şaŋyraq» qoǧamdyq bırlestıgınıŋ direktory Tūrar Şäken, «Naz» bi memlekettık teatrynyŋ direktory Erkebūlan Aǧymbaev, mädeniet qairatkerı, aqyn, sazger Ospan Süleimenūly, qalalyq mäslihat deputaty Mädina Äjıkenova, teatr jäne kino akterı Tolqyn Sūltan boldy.
«Qazaqtyŋ eŋ basty qūndylyǧy – tıl, dın jäne mädeniet. Onyŋ barlyǧy salt-dästürge arqa süieidı. Al otbasy dästürge berık bolsa, memleket te myqty bolady. Sondyqtan bügıngı saiysta öner körsetken otbasylar dästürge berık ekenderın anyq körsete aldy» dep qazylar alqasynyŋ töraǧasy Darhan Myŋbai jeŋımpazdardy qūttyqtap, otbasy qūndylyqtaryn berık ūstanǧan äuletterge rizaşylyǧyn bıldırıp, qūrmetın jetkızdı.
Jas otbasylar üş kezeŋ boiynşa synǧa tüstı. Alǧaşqysy «Bızdıŋ otbasynyŋ bır künı» atty beinesaiys kezeŋı bolsa, odan keiın «On sausaqtan öner tamǧan» kezeŋınde erı men zaiybynyŋ äzırlep äkelgen dünielerı nazarǧa ūsynyldy. Kelınşekter ūmyt bola bastaǧan ūlttyq dämderden as äzırlep äkelıp, tarihy men daiyndalu jolyn baiandasa, joldasy qamşy öru, teŋge soǧu, zergerlık öner, aǧaş būiymy, müsın jasau, t.s.s. dästürlı öner būiymynyŋ tarihy men äzırlenu jolymen tanystyrdy. «Öner, bılım bar jūrttar» atty soŋǧy şyǧarmaşylyq kezeŋde otbasylar özderın tanystyryp, tarih, etnografiia, salt-dästür, folklor, maqal-mätel boiynşa sūraqtarǧa jauap berıp, än aityp, bi bilep, öner körsettı.
«Būl baiqaudyŋ köpke tigızer paidasy mol. Är otbasy qazaqtyŋ salt-dästürın ūstanyp, balalaryna körsetıp otyrǧany jön. Sol arqyly sanaly ūrpaq tärbieleidı. Mūndai jarysqa bız otbasymyzben bırınşı ret qatysyp otyrmyz. Bos uaqytymda balalarymmen asyq oinaudy, arqan tartysty ūnatamyz» dedı qatysuşylardyŋ bırı Nūrlybek Sämekov.
Saiys qorytyndysy boiynşa bas jülde Sämek janūiasyna, 1-oryn Ūlyqpanūly otbasyna, 2-oryn Halat janūiasyna, 3-oryn Qazievter otbasyna jäne «Körermen közaiymy» nominasiiasy Raşitovtar otbasyna tabystaldy. Jeŋımpaz otbasylarǧa aǧaştan jasalǧan qazaqtyŋ tūrmysta qajet zattary, jazuşy Zeinep Ahmetovanyŋ salt-dästür jaily «Küretamyr» kıtaby jäne balalarǧa arnalǧan boiamaqtar syiǧa berıldı.
