Medisinalyq qyzmetke qoljetımdılıktı arttyru maqsatynda bügınde barlyq emhanada şūǧyl kömek körsetu bölımşesı jūmys ısteidı. İzrail elınıŋ täjıribesı negızınde sondai bölımşe Astanadaǧy №5 qalalyq emhanada da byltyr 10 qaŋtarda aşylǧan bolatyn.
Qimyl-qozǧalysy qiyn nauqastardy eskere otyryp, emhananyŋ bırınşı qabatynda aşylǧan būl bölımşe 2 qabyldau kabinetı, EKG jürgızu kabinetı, mamandar konsultasiiasy jäne call-ortalyqtan tūrady. Ony aşuda bırneşe mındet közdeldı: bırınşıden, stasionarlardyŋ qabyldau bölmesıne tüsetın jüktemenı azaitu, ekınşıden, 4-sanatty jedel järdem boiynşa tüsetın qoŋyraular men üige şaqyrtular sanyn tömendetu, üşınşıden, medisinalyq qyzmetke qoljetımdılıktı arttyra otyryp, nauqastardyŋ emhana jūmysyna qanaǧattanu deŋgeiın jaqsartu.
– Nauqastar auruhanaǧa jatqyzu qajettılıgı joq şūǧyl kömek körsetu kerek bolǧan jaǧdaida, sonyŋ ışınde körsetılımı men salalyq därıgerlerdıŋ konsultasiiasy men diagnostikalyq qaǧazy bolsa, sol künı «qazır jäne osy jerde» qaǧidaty boiynşa medisinalyq kömek ala alady. Emhananyŋ būl bölımşesındegı medisinalyq kömek, olar osynda tırkelmegen bolsa da, körsetıle beretının aita ketu kerek. Sonymen qatar olardyŋ saqtandyru jüiesınde bolu-bolmauy da maŋyzdy emes jäne aldyn ala jazylmai-aq, aptanyŋ barlyq künı taŋerteŋgı saǧat 8.00-den keşkı 20.00-ge deiın kelıp qaralady, – deidı emhana direktory Altynşaş Tabuldina.
Būl mäselelerdı şeşude emhanadaǧy call-ortalyqpen bırlesken jūmystyŋ septıgı tiiude. Atap aitqanda, nauqas habarlasqan kezde bölımşe därıgerı onlain-konsultasiia jürgızıp, call-ortalyq operatory nauqastan saualnama alyp, şaǧymyn tyŋdaǧannan keiın, ony bölımşege şaqyrady.
– Därıgerdı üige şaqyrtu boiynşa bızge künıne 40-60 qoŋyrau tüsse, sonyŋ tek 20 paiyzy ǧana bölımşege şaqyrtylady, būl – şamamen 8-12 nauqas. Demek, būl nauqastar sol habarlasqan künı-aq auru boiynşa körsetılımı bolǧan jaǧdaida, diagnostikalyq qyzmetter keşenı men mamandar konsultasiiasyn aluda. Bölımşe qūramyndaǧy därıgerler, feldşerler, mobildı brigada feldşerlerı nauqastardyŋ üiıne baryp ta nemese öz betınşe kele almaitynyn emhanaǧa äkelıp te tekseru jürgızıp, salalyq mamandardyŋ tekserısıne beredı. Bügıngı taŋda şūǧyl kömek körsetu bölımşesınde ortaşa eseppen künıne 40 adamǧa deiın qaralady, sonyŋ ışınde hirurgiialyq em körsetu boiynşa 12 paiyz, jaraqat alumen 16 paiyz, sozylmaly aurularynyŋ asqynuy jaǧynan 57 paiyz, ötkır allergiialyq jaǧdaimen 4 paiyz, auyrsynu sindromymen 11 paiyz nauqas keledı. Ortaşa eseppen aptasyna 3 adam auruhanaǧa jatady, köbıne olar – ötkır hirurgiialyq patologiiasy bar, jaraqat alǧan, mi qan ainalymy qatty būzylǧan, ötkır qan tamyry aurulary bar nauqastar, – deidı emhana basşysy.
Jaŋa bölımşenıŋ basty közdegenı – nauqastarǧa der kezınde kömek beru, medisinalyq qyzmetke qoljetımdılıktı arttyru. Bügıngı taŋda osy bölımşe jūmysy nätijesın berıp te ülgergen. Mäselen, därıgerdı üige şaqyrtu 30 paiyz, jedel järdem qyzmetıne törtınşı sanattaǧy şaqyrtu 15-20 paiyz, jaraqattanu punktıne keluşıler azaidy. Jūmysy tiımdılıgın körsetkendıkten, mūndai bölımşeler barlyq emhanada aşyluda.
