Elordanyŋ tuǧan künı qarsaŋynda Astanada duatlonnan ekınşı aşyq turnir ūiymdastyryldy. Jarystyŋ aşylu saltanatyna QR Premer-ministrı Kärım Mäsımov, QR Prezidentı Äkımşılıgınıŋ basşysy Ädılbek Jaqsybekov, QR Mädeniet jäne sport ministrı Arystanbek Mūhamediūly jäne tanymal veloşabandoz, Olimpiada chempiony Aleksandr Vinokurov qatysty.
– Astanada osyndai duatlon jarysyn ötkızu turaly ideiany Ädılbek Ryskeldıūly qala äkımı bolyp otyrǧan kezde kötergen edı. Men de būǧan qoldau körsetuge uäde etkenmın. Menıŋşe, mūndai auqymdy şara – bas şahardyŋ tūrǧyndary üşın ülken mereke, – dedı Ükımet basşysy K.Mäsımov.
Öz kezegınde Prezident Äkımşılıgınıŋ basşysy Ä.Jaqsybekov barşa otandastardy sportpen ainalysuǧa şaqyrdy.
– Elbasynyŋ tapsyrmasyna säikes, elımızde, sonyŋ ışınde Astanada sport pen mädeniettı damytuǧa köp köŋıl bölınude. Jyl saiyn sporttyq saiystar qatary artyp keledı. Ūltymyz üşın eŋ basty bailyq – densaulyq. Sondyqtan bärıŋız de sportpen şūǧyldanyŋyzdar, – dep atap öttı Ä. Jaqsybekov.
Duatlon jarysy «Bäiterek» monumentınıŋ aldyndaǧy alaŋnan bastaldy. Bäige şarty boiynşa, qatysuşylar alǧaşqy 5 şaqyrymdy jügırıp, odan keiıngı 15 şaqyrymdy velosipedpen, soŋǧy 5 şaqyrymdy qaita jügırıp ötkeru kerek boldy. Iаǧni, joldyŋ jalpy ūzyndyǧy – 25 şaqyrym. Būl araqaşyqtyq kezdeisoq taŋdalǧan joq. Joldyŋ ūzaqtyǧy mereitoilyq data – Qazaqstan täuelsızdıgınıŋ 25 jyldyǧymen säikes keledı.
Saiyskerler Qonaev köşesınıŋ boiymen Qabanbai batyr daŋǧylyna şyǧyp, keiın Dostyq jäne Orynbor köşelerımen jügırıp öttı. Märede jasalǧan arnaiy aimaqta sportşylar velosipedke otyryp, jarysty jalǧastyrdy. Velojarys ta Qonaev köşesınen bastalyp, Qabanbai batyr daŋǧylymen jalǧasty. Duatlonǧa qatysuşylar Nazarbaev ziiatkerlık mektebı janynan qaita ainalyp, Kerei jäne Jänıbek handar köşesıne deiın bardy. Sodan keiın osy jolmen Orynbor köşesıne deiın jürıp, Qonaev köşesıne jettı. Esterıŋızge sala keteiık, «Astana-duatlon – 2016» aşyq qalalyq turnirıne 16 jastan asqandardyŋ bärı de qatysa aldy.
Duatlonşylar bes top boiynşa marapattaldy. Erler arasynda 29 jastaǧy Evgenii Nepomniaşnii jäne äielder arasynda 16 jastaǧy Janerke Asan absoliuttı chempion atandy. Olar säikesınşe 56,10 minut jäne 1 saǧat 13,21 minutta märege jettı. Būl qatysuşylar – 16 men 30 jas aralyǧyndaǧy jeŋımpazdar. Iаkov Kozlov (1 saǧat 1 minut) jäne Elena Ponomareva (1 saǧat 22 minut) 31 men 40 jas sanatynda jügırude top jardy. Al 41 pen 50 jas sanatynda İgor Karachev (59,43 minut) jäne Tatiana Mihaleva (1 saǧat 24 minut) köş bastady. Sondai-aq, 50 jastan asqandar arasynda «Qazaqstannyŋ Damu Bankı» aksionerlık qoǧamynyŋ Basqarma Töraǧasy Bolat Jämışev üzdık atandy. Qalada ötkızıletın barlyq sporttyq-būqaralyq şaralarǧa tūraqty türde qatysyp jüretın ol belgılengen qaşyqtyqty 1 saǧat 9 minutta baǧyndyrdy.
Jeŋımpazdar baǧaly syilyqtarmen jäne elordalyq sporttyq mekemelerge arnalǧan abonementtermen marapattaldy. Saltanatty marapattau räsımınen soŋ duatlonǧa qatysuşylar men şara qonaqtary üşın «Bäiterek» monumentınıŋ aldyndaǧy alaŋda konserttık baǧdarlama, sondai-aq, lotereia ūtysy ūiymdastyryldy.
Botagöz MARATQYZY
