Qazaqstannyŋ oŋtüstıgınen soltüstıkke köşıp barǧan otbasylardyŋ sany 1,5 myŋǧa juyqtady. Köşke ıleskenderdıŋ basym bölıgı Soltüstık Qazaqstan, Qostanai, Pavlodar, Şyǧys Qazaqstan oblystaryna qonys audarypty.
«Jūmys küşı jetıspeitın oŋtüstık öŋırlerden soltüstık oblystarǧa 1 488 otbasy nemese 4 925 adam köşırıldı. Sonyŋ ışınde eŋbekke jaramdy jastaǧylar – 2 523 adam, olardyŋ 1 424-ı nemese 56 paiyzy jūmysqa ornalasty. 87 adam käsıpkerlıkpen ainalysady» dep mälımdedı Ükımet otyrysynda Eŋbek jäne halyqty äleumettık qorǧau ministrı Mädina Äbılqasymova.
Statistika boiynşa, Şyǧys Qazaqstan oblysyna – 413 otbasy, Soltüstık Qazaqstan oblysyna – 400, Pavlodar oblysyna – 361, Qostanai oblysyna – 224, Aqmola oblysyna 90 otbasy köşıp barǧan. Ärine, köşke ılesken qazaqtyŋ basyn auyrtyp, baltyryn syzdatqan mäselenıŋ bırı – baspana. Bız būl turaly naqtylap jazǧan edık (qaraŋyz: «Astana aqşamy», «Qozǧal halqym, soltüstıkke!», 4 qyrküiek, 2018 jyl). Köşıp-qonuǧa berıletın 84,2 myŋ teŋge baspana mäselesın şeşpeidı. Memleket köşken jūrtty qoldau üşın baspanamen qamtamasyz etetın boldy. Mädina Äbılqasymova Ükımet otyrysynda Soltüstık Qazaqstan oblysyna aldaǧy üş jylda köşıp baratyn 3 myŋǧa juyq qazaqstandyqtarǧa üi berıletının habarlady. Bırınşıden, olar jūmys beruşınıŋ şaqyruymen baruy tiıs. Ekınşıden, qonys audarǧan jerınde bes jylǧa deiın tūruǧa mındettı. Būl maqsatqa el biudjetınen 2019-2021 jyldarǧa 15 mlrd teŋge bölu qarastyrylyp qoiypty.
Biyl 9 şıldede ötken Ükımet mäjılısınde ministr soltüstık öŋırlerge 9,1 myŋ adam köşudı josparlaǧanyn aityp edı. Būl jolǧy basqosuda ol sannyŋ 8 myŋǧa deiın azaiǧanyn jetkızdı.
