Elordada kezektı bos oryndar järmeŋkesı öttı. Onda 70 käsıporyn mekemesı 400 jūmys ūsyndy.
Järmeŋkege kelgen Mahambet Amrin oqudy ötken jyly ǧana bıtırgen. Radiotehnika, elektronika jäne telekommunikasiialar mamandyǧy boiynşa jūmys ıstegısı keledı. Byltyr «Astana EKSPO-2017» ūlttyq kompaniiasynda bailanys injenerı bolyp qyzmet atqarǧan. Kompaniiadaǧy qysqartudan keiın jūmyssyz qalǧan jas maman būl joly da mamandyǧy boiynşa jūmys taba almady. Mahambettıŋ aituynşa, ūsynylǧan oryndardyŋ jalaqysy da tömen.
Astana qalasy äkımdıgınıŋ Jūmyspen qamtu ortalyǧynyŋ basşysy Oljas Omar derekter bazasynda 4500-ge juyq jūmys orny bar ekendıgın aitady. «Köbınese qyzmet körsetu salasynda mamandar jetıspei jatady. Tehnikalyq mamandar men qūrylysşy siiaqty jūmysşylar da sūranysta» deidı ol.
Äkımdıktıŋ jūmyspen qamtu ortalyǧy bızdıŋ redaksiianyŋ jol boiynda ornalasqan. Ortalyqqa taŋerteŋnen aǧylyp kele jatqan ata-äjelerdı baiqaimyz. Oraiy kelgende, ortalyq basşysynan mūnyŋ mänısın sūradyq. «Negızı, zeinetkerler balalary men nemerelerıne jūmys ızdep keledı.
«Nemerem üide otyr, sızderde qandai jūmys bar?» dep sūraidy. Bız olardan «Nege nemereŋız emes, özıŋız keldıŋız?» dep sūrasaq, «Onyŋ qoly timeidı», «Özı barǧysy kelmeidı» degen syndy jauaptar estimız» dedı ortalyq basşysy.
Eske sala keteiık, ortalyqta jūmysynan aiyrylǧandarǧa berıletın järdemaqy qarastyrylǧan. Jūmys beruşı Memlekettık äleumettık saqtandyru qoryna är qyzmetkerı üşın aqşa audarady. Mäselen, eger jūmysşy tölenetın zeinetaqy men salyqty alyp tastaǧanda, qolǧa 100 myŋ teŋge alsa, onyŋ soŋǧy 24 aiy eseptelınedı. Osylaişa, 4 ai qatarynan 28 myŋ teŋgedei järdemaqy tölenedı.
Güldana TALǦATQYZY
