Elımızde şaǧyn jäne orta biznestı qoldauǧa baǧyttalǧan «Biznestıŋ jol kartasy» baǧdarlamasy myŋdaǧan käsıptıŋ qalyptasuyna mümkındık berdı. Biyl bas qalada 57 biznes-joba qarjylandyrylyp, ıske asqan.
Otandyq önerkäsıptıŋ damuyna üles qosyp, biznesten bereke tapqandardyŋ bırı – Äliia Toqtanaeva. Käsıpker ana «Biznestıŋ jol kartasy – 2025» baǧdarlamasyna öz biznes jobasyn ūsynyp, qarjylai qoldauǧa ie bolǧan. Bügınde balalardyŋ este saqtau qabıletın arttyruǧa arnalǧan oiynşyqtar öndırudı qolǧa alypty. «Qyzymyz mazasyz boldy. Zeiını men este saqtau qabıletın jaqsartatyn oiynşyqtar ızdedık. Mūndai önımderdı elordadan tabu qiyn. Naryqty importtyq önımder jaulaǧan. Sondyqtan sapasy jaǧynan şeteldık oiynşyqtardan kem tüspeitın oiynşyqtar şyǧarudy maqsat ettık. Bız şeteldık naryqty zerttedık. Qazır jartyşar aralyq taqtalar, balansirler, bodibordtar, tangramdar, tekşeler, slaidtar, köldeneŋ syryqtar, ätkenşekter jäne basqa zattar bar. Olardyŋ erekşelıgı balanyŋ zeiının aşyp, kritikalyq oilau qabıletın nyǧaituǧa kömektesedı. Oiynşyqtarymyz bır jastan 15 jasqa deiıngı balalarǧa arnalǧan ärı erekşe qajettılıgı bar balalarǧa da tiımdı. Bız aǧaş şeberhanasyn aştyq ärı qajettı qūral-jabdyqtarǧa da tapsyrys berdık. Qazır öndırıstı ıske qosu üşın daiyndyq jūmystary jürgızılude. Aqpan aiynan bastap, tolyǧymen ıske kırısemız» deidı «GA oiynshyqtar fabrikasy»-nyŋ jetekşısı.
«Biznestıŋ jol kartasy» jobasynyŋ taǧy bır qatysuşysy, ADAMI zergerlık şeberhanasynyŋ negızın qalauşy Damira Abikenova zergerlık būiymdar jasaumen ainalysady. Ol jobadan jeŋgen qarajatqa kümısten jasalǧan būiymdarǧa altyn jalatuǧa qajettı tehnikany satyp alyp, şeberhanasyn keŋeitıptı.
«Tabiǧi tastarmen kümıs zergerlık būiymdar şyǧaramyz. Būl baǧytta tört jylǧa juyq ızdendım. Jan-jaqty zerttedım. Özım būiymdar jasai bastadym. Uaqyt öte kele öz käsıbımdı aşqym keldı. Nätijesınde baǧdarlamaǧa qatysyp, biyl armanymdy oryndadym. Zergerlık būiymdar jasau asqan şeberlıkpen qatar türlı tehnikany, qūral-jabdyqtardy qajet etedı. Olardyŋ baǧasy da qymbat. Al käsıbın endı bastaǧandar üşın ondai şyǧyndardy köteru qiyn. Sondyqtan baiqauǧa qatystym, būl mümkındık men üşın ülken qoldau boldy» deidı Damira Abikenova.
«Biznestıŋ jol kartasy» baǧdarlamasyna käsıpkerlermen qatar öz biznesın aşqysy keletın köpbalaly, jalǧyzbasty analar, mümkındıgı şekteulı jandar men 50 jastan asqan azamattar da qatysa alady.
