Osydan tura 39 jyl būryn, 1979 jyldyŋ 25 jeltoqsan künı Keŋes äskerı Auǧanstanǧa kırgen edı. Osy eldegı soǧys jaǧdaiynda bır myŋǧa juyq qazaqstandyq jauynger erlıkpen qaza tapty. 1989 jyldyŋ 15 aqpany künı Keŋes äskerınıŋ şekteulı kontingentı Auǧanstannan şyǧaryldy.
Astana qalasynyŋ ortasynda, qazır aityp jürgenımızdei, Esıldıŋ oŋ jaǧalauyndaǧy Abai daŋǧyly men M.Äuezov köşesınıŋ qiylysynda ornalasqan Otan soǧysy mügedekterıne arnalǧan gospital erterekte «Obkomnyŋ emhanasy» atalatyn. Mūnda, negızınen, Selinograd oblystyq partiia komitetınıŋ basşylyq qyzmetkerlerı men Ūly Otan soǧysynyŋ maidangerlerı ǧana emdeletın. Keiınnen būl mekeme tek soǧys ardagerlerı men Chernobyl apaty saldaryn joiuǧa qatysuşylarǧa, Semei poligonynda qyzmet atqarǧandarǧa medisinalyq qyzmet körsetetın boldy.
Selinograd qalasyndaǧy medisina uchilişesın bıtırgen Baqyt Qalieva eŋbek jolyn osy mekemede, atap aitqanda №4 emhanadan bastaǧan. Būl 1983 jyl edı. Bala kezınen aq halat kiıp emhanada jūmys ısteudı armandaityn meiırımdı qyzǧa mūndaǧy jūmys bırden ūnady. Äsırese, maidangerler atalarǧa kömektesken saiyn köŋılı köterıle tüsetın.
Taǧdyr degen taban astynda kütpegen tartu jasaidy eken, jap-jas medbike Baqyttyŋ ömırı de bır sätte özgerıp şyǧa keldı. Emhanada jatqan qalalyq äskeri komissariattyŋ bastyǧy osyndaǧy medbike qyzdardy jinap alyp «Auǧanstanǧa baratyndaryŋ bar ma? Ol jaqta jaralanǧan, syrqattanǧan jauyngerlerge em-dom körsetetın medisina qyzmetkerlerı jetpei jatyr. Bıraq eskertemın, būl – täuekeldı ūsynys. Soǧys bolyp jatqanyn bıletın şyǧarsyŋdar» dep aşyǧyn aitty. Sodan oilanyp-tolǧanyp tört-bes qyz baratyn boldy. Bärı bır künde qalalyq äskeri komissariatqa raport berdı. Alaida tek Baqyt Qalieva ǧana şaqyrtu alatyn boldy. Söitıp, 1984 jyldyŋ aqpan aiynda qazaqtyŋ qarşadai qyzy oq pen otqa oranǧan Auǧanstannyŋ Puli-Humri provinsiiasynda ornalasqan äskeri gospitalǧa keldı.
Baqyttyŋ alǧaşqy baiqaǧany, mūnda eldegıdei jaibaraqat tırlık joq eken. Emdeuşı de, emdeluşı de qaharly bolyp körındı. Palataǧa bas sūqqany sol edı, basyndaǧy bailaǧan aq märlısı qyp-qyzyl qanǧa boialǧan, yŋyrsyp jatqan jauyngerdı körgende Baqyttyŋ denesı mūzdap ketkendei boldy. Būryştaǧy keruette jatqan jıgıttıŋ oŋ aiaǧy tızeden joǧary kesılgen eken… Ersılı-qarsyly jürgen jauynger sol qolyn moinyna jıppen bailap alypty. Osy körınıstıŋ bärı «obkomnyŋ emhanasynan» kelgen jas medbikenıŋ sanasyn dür sılkındırdı. Köp ūzamai-aq «Özım sūranyp kelgenmın. Endı şegınetın jer joq. Men osy jaraly jauyngerlerge kömektesuım kerek. Sol üşın keldım ǧoi…» dep özın-özı qamşylap jıberdı. Sol sätten berı Baqyt Qalieva qanşama adamnyŋ janyn saqtauǧa qol ūşyn sozdy. Özındei örımdei jıgıtterdıŋ ömır üşın küresuıne kömektestı. Auyr jaraqattan jany qinalǧandarǧa meiırımın körsettı. Osylaişa Auǧanstan soǧysynyŋ alapatyn közımen körıp, jüregımen sezıngen aqmolalyq aru araǧa ekı jyl salyp elge oraldy.
1986 jyldyŋ mamyr aiynda Baqyt Qalieva eŋbek jolyn bastaǧan qalalyq gospitalǧa qaita keldı. Mūndaǧy därıgerler qauymy keudesıne ekı medal taqqan medbike qyzdy qūşaq jaiyp qarsy aldy. Söitıp, beibıt ömırdegı alaŋsyz jūmysyn jalǧastyrdy. Özı jaqsy köretın Ūly Otan soǧysy maidangerlerıne meiırlene qyzmet körsete berdı.
Öz ısıne jauapkerşılıkpen qaraityn Baqytty emhana basşylyǧy Taşkent qalasynda ötken 1-ınşı Bükılodaqtyq internasionalist-medikter sletıne delegat retınde jıberdı. Osy şara barysynda «Auǧanstan halqynyŋ rizaşylyǧy» medalımen marapattaldy. Keŋes Odaǧynyŋ Batyry Ruslan Auşev «Za zaslugi» medalın tabys ettı. Sonymen qatar Baqyt Qalieva – «Äskeri medisinaǧa sıŋırgen eŋbegı üşın» belgısınıŋ iegerı.
Kündelıktı jūmysymen qatar, qoǧamdyq şaralarǧa da belsendı qatysatyn jauynger-internasionalist Baqyt Qalieva bügınde zeinet demalysyna şyqqan. Bıraq ömırınıŋ özegıne ainalǧan süiıktı ısınen alystap kete almai jür. Astana qalasyndaǧy №1 köpbeiındı auruhanasynda dietolog-medbike qyzmetın atqarady. Özınıŋ jolymen kele jatqan jas medbikelerge bılgenın üiretedı, ömırlık täjıribesımen bölısedı. Al jūmystan qoly qalt etkende «Astana qalasynyŋ Auǧanstan soǧysy mügedekterı men ardagerlerı odaǧy» ūiymyna asyǧady. Mūnda ol jan-jüregın ūǧynatyn, soǧys otyna şarpylǧan jauynger-internasionalistermen syrlasady. Jastardy otandyq patriotizmge tärbieleitın qoǧamdyq ıs-şaralarǧa qatysady. Būl – soǧys tabiǧatyn jan-tänımen tüisıngen qazaq qyzynyŋ azamattyq ūstanymy.
