Elordada «Astana jastary – Qazaqstannyŋ industrialdyq strategiialyq damuynda» atty qalalyq jastar forumy öttı. Astanadaǧy 36 kolledjdıŋ studentterı qatysqan būl jiynda ırıktelıp alynǧan 7 äleumettık joba tanystyryldy.
Sol jūmystardyŋ ışınde politehnikalyq kolledjdıŋ 4-kurs studentı Äli Saparbek ūsynǧan BookCrossing jobasy bar. Eŋ alǧaş 2001 jyly AQŞ-ta paida bolǧan būl joba aiasynda adamdar bır-bırımen tegın kıtap almasady.
– 2017 jyly politehnikalyq kolledjde BookCrossing ıs-şarasyn ūiymdastyrdym. Oǧan 450-dei student qatysyp, 500-den asa kıtap almastyryldy. Sol kezde būl jobanyŋ jastar arasynda sūranysqa ie ekenıne közım jettı. Būl jerde kıtap oquşylardyŋ sanyn arttyru basty maqsat emes, aldymen oqylǧan kıtap kädege jarauy kerek, – deidı Ä.Saparbek.
Sondai-aq jūrtşylyqqa tanystyrylǧan jūmystardyŋ qatarynda şaruaşylyqqa tiımdı jobalar da boldy. Mäselen, «Tūran-Profi» qalalyq şaruaşylyq kolledjınıŋ 3-kurs studentı Altynbek Nūrdäulet naizaǧai säulesınen quat alu jobasyn jasaqtap jatqanyn aitty. Oǧan būl ideia elordadaǧy EKSPO körmesındesı volonterlık täjıribesı barysynda kelıptı.
– Qazaqstan künnen, jelden quat alatyn qondyrǧylardy öte qymbatqa satyp alady. Nege bız otandyq jobany äzırlemeimız degen sūraq tuyndap, aqyrynda osy jobamdy jasap şyǧardym. Naizaǧaidyŋ bır ret tüsuınen jarty jylǧa jetetın energiia quatyn öndırıp aluǧa bolady. Jobanyŋ taǧy bır artyqşylyǧy, ol halyqty jaŋa jūmys oryndarymen qamtamasyz etedı, – deidı A.Nūrdäulet.
