ABYROI ASULARY
Adam tarihty jasaidy, al tarih adamdy synaidy. Al synaqty kötergendı elı de qūrmetteidı, jūrty da jaqtaidy. Qūdaiǧa şükır, qazaqta osyndai san qatparly synaqtan sürınbei ötıp, köpşılıktıŋ köŋılınen şyǧyp jürgen jaisaŋ jandar jeterlık. Sondai elıne eleulı, halqyna qalauly azamattyŋ bıregeiı Ädılbek Jaqsybekov der edım.
Ädılbek Jaqsybekov elımızdıŋ täuelsızdık alyp, derbes memleketımız qūryla bastaǧan qiyn tūsynda jaŋa ekonomikalyq qatynasty igeruge batyl kırısken sanauly käsıpkerlerdıŋ qatarynan. Mäskeudegı Bükılodaqtyq memlekettık kinematografiia institutynyŋ ekonomika fakultetın bıtırdı. Alaida, jaŋa zamannyŋ talabyn tez ūǧyndy ma eken, 1987 jyly Plehanov atyndaǧy halyq şaruaşylyǧy institutynyŋ qaita daiarlauynan öttı. Qat-qabat şaruaǧa bel şeşe kırısıp ketken jas käsıpker taŋdaǧan mamandyǧyna qarai ǧylymi jūmyspen de ainalysyp, nätijesınde ekonomika ǧylymdarynyŋ kandidaty atandy. 1988-1995 jyldar aralyǧynda «Sesna» köp salaly korporasiiasyn basqaryp, otandyq öndırıstı ūiymdastyrudyŋ önegesın körsete bıldı. Korporasiia qūramyndaǧy käsıporyndardyŋ türlı önımderı men körsetken qyzmetı tūtynuşynyŋ igılıgıne ainala berdı. Berekelı ıske bas bolyp jürgen azamatty Aqmola tūrǧyndary 1995 jyly Qazaqstan Respublikasynyŋ Parlament Senatyna deputat etıp sailady. Elımız endı egemendıgın alǧan, alaida, Keŋes odaǧy kezındegı äleumettık-ekonomikalyq jaǧdai qūldyrap tüsken tūsta künkörıstıŋ jaŋa täsılın igeruge, iaǧni biznes jürgızu arqyly otandyq ekonomikany damytuǧa qalai üles qosudyŋ jolyn tapqan Jaqsybekovtıŋ jıger-qairaty elenbei qaluy mümkın emes edı. Būǧan qosa Parlament qabyrǧasyndaǧy belsendı pozisiiasy da aiqyn baiqala bastady. Köp ūzamai-aq naqtylap aitqanda 1996 jyly Aqmola oblysy äkımınıŋ bırınşı orynbasary qyzmetıne taǧaiyndalady. Būl Qazaqstan Respublikasynyŋ Prezidentı Nūrsūltan Nazarbaevtyŋ el astanasyn Almatydan Aqmolaǧa köşıru bastamasyn köteruımen tūspa-tūs kelgen kezeŋ bolatyn. Elbasymyzdyŋ osy bır tarihi ideiasy köp ūzamai jüzege asty, aqiqatqa ainaldy. Mıne, däl osy tūsta jaŋa eloradaǧa asa jauapty, asa ısker basşy kerek bolǧany sözsız edı. Qai ıstı bolsyn asqan köregendılıkpen, tereŋ talǧampazdyqpen şeşetın Nūrsūltan Äbışūlynyŋ osy jolǧy taŋdauy Jaqsybekovke tüstı. Söitıp 1997 jyldyŋ 10 jeltoqsanynda Ädılbek Ryskeldıūly Jaqsybekov Memleket basşysynyŋ Jarlyǧymen jaŋa astanamyzdyŋ äkımı bolyp taǧaiyndaldy. Eldıktı köksegen er azamat üşın būdan artyq jauapkerşılık boluy mümkın be?! Osy oraida, kezınde qala äkımınıŋ baspasöz hatşysy bolǧan, tanymal publisist Sädıbek Tügeldıŋ myna bır estelıgın keltırgendı jön sanadym: «Elbasymyz Nūrsūltan Nazarbaevtyŋ kadr saiasatyndaǧy ülken jetıstıkterınıŋ bırı – Aqmola qalasyna Ädılbek Jaqsybekovtı äkım etıp taǧaiyndauy edı. Būl – bır menıŋ ǧana pıkırım emes, Arqa öŋırındegı aǧaiynnyŋ auzynda jürgen äŋgıme. Jaŋa astanamen bırge jasasyp kele jatqan jūrtşylyqtyŋ közben körıp, oiǧa tüigen şynaiy şyndyǧynyŋ özı osy bolaryna eş kümän keltıre almaisyŋ! Şyntuaitynda, Ädılbek Ryskeldıūlynyŋ qala basşylyǧyna taǧaiyndaluymen bas şaharǧa sony özgerıs, jaŋa lep kelgendei boldy. Eŋ basty erekşelıgı – Elbasy tapsyrmalaryn mültıksız oryndap, senımnen şyǧa bıluınde jatsa kerek qoi. Ärdaiym ızdenıs üstınde jüretın Ädekeŋ – jylt etken jaŋalyqqa jany qūmar. Müldem jaŋaşa oilaityn ūrpaqtyŋ ökılı. Tuǧan qalasynyŋ oi-şūqyryn bes sausaqtai jatqa bılıp, sony jūmys barysynda dūrys paidalana bıletındıgın san märte däleldegen azamat» dep aǧynan jarylady ärıptes aǧamyz.
ÖMIRDEREK
1954 jyly 26 şıldede Qostanai oblysy Qarabalyq audanynyŋ Börılı auylynda tuǧan.
1977 jyly Bükılodaqtyq memlekettık kinematografiia institutynyŋ (Mäskeu qalasy) ekonomika fakultetın bıtırgen, 1987 jyly Plehanov atyndaǧy Mäskeu halyq şaruaşylyǧy institutynda materialdyq-tehnikalyq jabdyqtaudy ūiymdastyruşy mamandyǧy boiynşa qaita daiarlaudan öttı.
Ekonomika ǧylymdarynyŋ kandidaty.
Qazaq KSR Memkino jäne Memjabdyqtau jüiesınde jūmys ıstedı, bırqatar käsıporyndardy basqarǧan.
1988-1995 jyldary «Sesna» köp salaly korporasiiasyn basqardy.
1995 jyly Qazaqstan Respublikasy Parlamentı Senatynyŋ deputaty bolyp sailandy.
1996 jyly Aqmola oblysy äkımınıŋ bırınşı orynbasary bolyp taǧaiyndalady.
1997-2003 jyldary – Astana qalasynyŋ äkımı.
2003-2004 jyldary – Qazaqstan Respublikasynyŋ İndustriia jäne sauda ministrı.
2004-2008 jyldary – Qazaqstan Respublikasy Prezidentı Äkımşılıgınıŋ basşysy.
2008 jylǧy qaŋtar – qazan aralyǧynda – «Nūr Otan» halyqtyq-demokratiialyq partiiasy töraǧasynyŋ bırınşı orynbasary – QR Prezidentınıŋ keŋesşısı.
2008-2009 jyldary Resei Federasiiasyndaǧy Qazaqstan Respublikasynyŋ Tötenşe jäne Ökılettı Elşısı boldy.
2009-2014 jyldar aralyǧynda – Qazaqstan Respublikasynyŋ Qorǧanys ministrı.
2014 jylǧy 3 säuırde Memleket basşysynyŋ Jarlyǧymen Qazaqstan Respublikasynyŋ Memlekettık hatşysy bolyp taǧaiyndaldy.
QR Futbol Federasiiasynyŋ Prezidentı. 2008 jyly Astana qalasyndaǧy «Döŋgelek alaŋ» arhitekturalyq keşenı üşın Qazaqstan Respublikasy Memlekettık syilyǧynyŋ laureaty atandy.
«Qazaqstan Respublikasynyŋ Tūŋǧyş Prezidentı Nūrsūltan Nazarbaev», II jäne III därejelı «Barys», III därejelı «kniaz Iаroslav Mudryi» (Ukraina) ordenderımen jäne medaldarmen nagradtalǧan. «Zajech zvezdu-stolisu», «Tak nachinalas Astana. Zapiski pervogo akima stolisy» kıtaptarynyŋ avtory.
Ädılbek Jaqsybekov äkım bolǧan kezdegı kuä bolǧan myna bır oqiǧa da oiymyzda älı jaŋǧyryp tūrǧandai. Astana qalasynyŋ alǧaşqy tūsaukeserıne orai ötkızılgen baspasöz mäslihatyna qatysqan şeteldık jurnalistıŋ bırı oǧan «Qazaqstannyŋ jaŋa elordasy Astana qalasynda auyzsudyŋ sapasy naşar degen söz ras pa?» degen sūraq qoidy. Sonda Ädılbek Ryskeldıūly «Sızdıŋ būl sözdı qaidan estıgenıŋızdı bılmeimın, bıraq men üşın osy qalanyŋ suy – eŋ tättı su…» dep jauap berdı. … Bız bolsaq «Tuǧan eldıŋ, tuǧan jerdıŋ patrioty degen osyndai bolar» desıp, marqaiyp qaldyq. Şynymen solai emes pe?! Astananyŋ tūŋǧyş äkımıne qatysty mūndai jailardy däiektep tügendei bersek, ūzyn-sonar äŋgımege jalǧasa bermek. Olai deitınımız «Astana qalasynyŋ qūrmettı azamaty» ataǧyn alǧaşqylardyŋ bırı bolyp ielengen atpal azamattyŋ qarymdy da qaiyrymdy ısterı jaiynda älı künge deiın el auzynda jyly lebızder aitylady.
Elordamyzdyŋ alǧaşqy qazyǧyn qadauǧa qatysyp, Astana qalasynyŋ negızın qalauşy Elbasymyz Nūrsūltan Nazarbaevtyŋ jaŋa qalany saludaǧy ideialaryn jüzege asyruǧa qomaqty üles qosqan Ädılbek Jaqsybekov 2003 jyly mausym aiynda QR İndustriia jäne sauda ministrı qyzmetıne auysty. Odan keiın Prezident Äkımşılıgıne jetekşılık ettı.
Memleket basşysy jüktegen qai jūmysty bolsyn mūqiiat oryndai bıletın Ä.Jaqsybekov basqa da memlekettık maŋyzdy joǧary lauazymdy qyzmetterdı atqardy. Bügıngı taŋda Qazaqstan Respublikasynyŋ Memlekettık hatşysy qyzmetın abyroimen atqaryp jürgen Ädılbek Ryskeldıūly Jaqsybekov asqaraly jasty baǧyndyryp, kemel şaǧyna kelıp otyr.
El müddesı üşın aianbaityn azamattyŋ eŋbegı elenıp, jūrtynyŋ qūrmetıne bölenıp jatsa, kımge bolsyn, būdan asqan abyroi bola ma?! Osy oraida, bızdıŋ oiymyzşa qazaq elınıŋ jaŋa Astanasynyŋ tūŋǧyş äkımı bolǧan Ädılbek Jaqsybekov naǧyz abyroiy asqaqtaǧan azamat. Asqaqtai berıŋız!
Ǧalym QOJABEKOV