«Astana qalasynyŋ äkımı Ädılbek Jaqsybekov ötkızgen kezektı apparat mäjılısınde üleskerler mäselesın şeşu, elordada biznes jürgızu üşın qolaily jaǧdai jasau, qalalyq supermarketterde qyzmet körsetu jüiesın jaqsartu jäne qaladaǧy sanitarlyq jaǧdaidy baqylau mäselelerı talqylandy» dep habarlaidy qala äkımınıŋ baspasöz qyzmetı.
Jiynda üleskerler mäselesı turaly söz qozǧaǧan elorda äkımı jergılıktı atqaruşy bilık qūrylys kompaniialaryna jer telımderın jobalap, qūrylys jürgızıp, salynǧan nysandardy uaqytynda paidalanuǧa beru üşın beretındıgın atap öttı. Al, būl tärtıp būzylsa qūrylys kompaniialarynyŋ basşylary zaŋ aldynda jauap berulerı tiıs.
– İä, bız tek osy naryqtaǧy jaǧdaidy bılıp, qūrylys jürgızu men jer telımderınıŋ igerıluıne taldau jasap otyruymyz kerek, – dedı Ä.Jaqsybekov. Onyŋ aituynşa, älemdık täjıribede mūndai tüitkıldı mäseleler sot nemese özge de tiıstı organdar arqyly ǧana şeşıledı.
Astana qalasynyŋ aǧymdaǧy sanitarlyq jaǧdaiyna toqtala kele, äkım qala qūrylymdarynyŋ basty maqsaty – elordanyŋ kelbetın tiıstı deŋgeide ūstap tūru ekenın eskerttı. Būl jūmysty baqylauda ūstau üşın äkımnıŋ būiryǧymen jüielı türde jūmys ısteitın mobildı top qūrylǧan. Foto esepter jazyp, basqa da qaǧazbastylyqqa jol bermeu üşın Ä.Jaqsybekov būl jūmysty elektrondy türde jürgızudı tapsyrdy.
– Aitylǧan syn-eskertpelerdıŋ joiylǧany jönındegı barlyq suretter men esepterdı menıŋ jäne orynbasarlarymnyŋ kabinetterınde ornalasqan monitorlarǧa şyǧaru qajet. Sol arqyly jūmystyŋ qalai jürıp jatqanyn kez kelgen uaqytta körıp, kemşılıkterdı der kezınde joiyp, tez arada olqylyqtyŋ ornyn toltyramyz, – dedı äkım.
Apparat jiynynda talqylanǧan taǧy bır özektı mäsele – memlekettık qyzmet körsetu sapasy boldy. Qaladaǧy biznes-ahualdy jaqsartu üşın rūqsat beru resımderın azaitu kerek. Äkımnıŋ aituynşa, barlyq memlekettık qyzmetter tek qana halyqqa qyzmet körsetu ortalyqtary arqyly «bır tezeze» ūstanymy boiynşa jüzege asyryluy tiıs. Ärı qyzmet körsetu merzımı de tez boluy qajet.
Būl baǧytta memlekettık qyzmet körsetudegı biznes-üderısterdı zerttep-zerdelep, oŋtailandyru jönınde ūsynystar engızu üşın arnauly jūmys toby qūrylu kerektıgı aityldy.
– Būl jūmysqa biznes-qauymdastyqty, käsıpkerler palatasyn tartu qajet. Ony basqarudy Nūräli Älievke tapsyramyn, – dedı äkım. – Basty maqsat – Astanany biznes jürgızu üşın elımızdegı eŋ qolaily qalaǧa ainaldyru. Öz ökılettılıkterın joǧary qoiyp, būl baǧyttaǧy jūmystardyŋ maŋyzdylyǧyn tüsınbeitın basşylar qyzmetınen bosatylady.
Halyqqa qyzmet körsetu ortalyqtarynyŋ jūmysyn QR İnvestisiia jäne damu ministrlıgı ūiymdastyryp, qamtamasyz etetını belgılı. Alaida, jūmystyŋ sapasyna köŋılı tolmaǧan qala tūrǧyndary ūzyn-sonar kezekter men qolaisyz ışkı logistika, qyzmet körsetuşı adamdardyŋ dörekılıgı turaly barlyq syn-eskertpelerın qalalyq äkımdıkke joldaidy.
Osyǧan bailanysty Ä.Jaqsybekov qala äkımınıŋ apparatyna halyqqa qyzmet körsetu ortalyqtarynyŋ jūmysyna bailanysty barlyq syn-eskertpelerdı joiu mäselelerın baqylauǧa aludy tapsyrdy.
Apparattyq jiyn barysynda qalalyq supermarketterdegı tūtynuşylarǧa qyzmet körsetu deŋgeiı de talqylandy. Keiıngı kezde äleumettık jelılerde tūrǧyndar atalǧan sauda oryndarynyŋ jai-küiı men qyzmet körsetu deŋgeiınıŋ tömendıgıne köptegen syn aituda.
– Elorda dükenderınde kezdesetın keleŋsız jaǧdailarǧa tap bolǧan tūrǧyndardyŋ narazylyqtary men şaǧymdary öte köp, – dedı qala basşysy.
Būdan basqa, astanalyqtar supermarketterdegı esep aiyrysatyn kassalardyŋ jetkılıktı boluyna qaramastan, olardyŋ tek ekı-üşeuı ǧana jūmys ısteitındıgıne narazy. Al, būl jaǧdai ūzyn-sonar kezekke alyp keledı.
Qala basşysy Tūtynuşylardyŋ qūqyǧyn qorǧau departamentıne Käsıpkerlık jäne önerkäsıp basqarmasymen bırge qaladaǧy ırı sauda ortalyqtary ielerımen atalǧan mäselelerdı şeşu jönınde tiıstı jūmys jürgızudı tapsyrdy.
Sondai-aq, Ädılbek Jaqsybekov barlyq qalalyq qūrylymdarǧa Qazaq handyǧynyŋ 550 jyldyǧy men QR Konstitusiiasynyŋ 20 jyldyǧyna orai ötkızıletın merekelık şaralarǧa daiyndyq jūmystaryn küşeitudı tapsyrdy.
