Keşe Ortalyq kommunikasiialar qyzmetınde ötken baspasöz mäslihatyna ädılet ministrınıŋ orynbasary Baqytjan Äbdıraiym qatysyp, Memleket basşysynyŋ halyqqa arnaǧan «Nūrly jol – bolaşaqqa bastar jol» atty Joldauynda körsetılgen tapsyrmalar men jüktegen mındetterdı oryndauǧa bailanysty atqarylar jūmystar auqymyna toqtaldy.
«Juyrda ǧana bızdıŋ ministrlıkte Elbasynyŋ Qazaqstan halqyna arnaǧan «Nūrly jol – bolaşaqqa bastar jol» Joldauy aiasynda keŋeitılgen alqa mäjılısı ötken edı. Sol jiynda biylǧy Joldaudyŋ negızgı qaǧidalaryn eskere otyryp, ädılet ministrı vedomstvonyŋ keler jylǧa basym baǧyttaryn aiqyndap berdı. Atap aitqanda, atqaruşylyq öndırıstı qamtamasyz etu baǧytynda aliment, jalaqy syndy äleumettık qajettı sanattaǧy ısterdıŋ oryndaluyn jedeldetu tapsyrylǧan» dedı Baqytjan Jarylqasynūly.
Onyŋ aituynşa, ministrlıkte Vedomstvolyq jospar äzırlenıp, soǧan säikes jeke sot oryndauşylarynyŋ qolyna 2016 jyldan bastap zaŋdy tūlǧalardyŋ paidasyna tiesılı ısterdı tapsyru qarastyrylǧan körınedı.
Sonymen qatar, ol jurnalisterge taǧy bır erekşe jaŋalyq turaly söz qozǧady. Vise-ministrdıŋ aituynşa, aldaǧy uaqytta sot oryndauşysy boryşkerdıŋ tärkılengen mülkın öz betınşe baǧalau mümkındıgıne ie bolady, iaǧni, mülıkke baǧalau jürgızu üşın arnaiy baǧalauşy mamannyŋ kömegıne jügınu qajet emes. Būl uaqyt pen qarajatty ünemdeidı.
Soŋǧy uaqyttary elımızde auksionǧa qatysuşylardyŋ arasynda Bıryŋǧai elektrondy sauda alaŋy (BESA) da jiı qoldanysqa enıp jür. Sala mamandarynyŋ tüsındıruınşe, elektrondy auksion onlain tärtıbımen ötkızılıp, tärkılengen mülıktı saudaǧa şyǧaruda oǧan qatysy bar tūlǧalardyŋ auksion ūiymdastyruşylarymen bettesu mümkındıgıne tosqauyl qoiady.
Ädılet ministrınıŋ orynbasary: «Elımızde jaqynda ǧana qalyptasqan jeke sot oryndauşylary instituty jūmys atqaruda. Būl baǧytta lisenziialanǧan jeke sot oryndauşylarynyŋ kölemın memlekettık sot oryndauşylarymen teŋestırıp, 1 250 bırlıkke deiın ūlǧaitu közdelude. Qazırgı taŋda olardyŋ sany 561 mamanǧa jettı. Sol sebeptı, memlekettık tūrǧyda atalmyş qyzmet körsetu salasyn qoldau üşın bırqatar şaralar qolǧa alynǧandyǧyn atap ötken jön» dei kele, atqaryluǧa tiıs taǧy da bırneşe joba turaly aitty.
Elbasynyŋ halyqqa arnaǧan «Nūrly jol – bolaşaqqa bastar jol» atty Joldauyn talqylai kele, Baqytjan Äbdıraiym aǧymdaǧy jyldyŋ on aiynda äkımşılık aiyppūldardyŋ jalpy sany 542 myŋnan asyp tüsıp, onyŋ jalpy jiyntyq qūny 23 mlrd teŋgenı qūraǧandyǧyn mälımdedı. Äsırese, memleket äleumettık qajettı sanattaǧy qarajatty – aliment jäne jalaqyny öndırıp alu ısterıne jete köŋıl bölınedı eken. Jyl basynan berı elımızdıŋ sot oryndauşylary Äkımşılık qūqyq būzuşylyq kodeksınıŋ 524-baby boiynşa 2359 boryşkerdı äkımşılık jauapkerşılıkke tartsa, 2013 jyly bar bolǧany 1 646 boryşkerge ǧana äkımşılık jaza qoldanylǧan.
Al keler jyly boryşkerler aiyppūldaryn äuejailarda, temırjol jäne avtokölık beketterınde tıkelei tölei alatyn boldy. Baqytjan Jarylqasynūlynyŋ aituynşa, qazırgı uaqytta ministrlık osy mäselenı retteu üşın arnauly terminaldardy atalǧan mekenderge ornatu turaly ūsynys jasaǧaly jatyr.
Būdan bölek, ädılet ministrınıŋ orynbasary jurnalisterge ädılet organdarynyŋ jüiesınde jürgızılıp jatqan basqa da reformalar turaly keŋınen aityp berdı. Solardyŋ qatarynda köpşılıktıŋ sūranysyna baǧyttalǧan onlain rejimde sot şeşımınıŋ oryndaluyna qatysty jaŋaşyldyq boldy.
«Otandastarymyz 2015 jyldan bastap, sot şeşımderınıŋ oryndaluyn atqaruşylyq öndırıstıŋ tırkeluınen, onyŋ tolyq aiaqtaluyna deiıngı prosestı onlain rejimde baqylai alady» dedı Baqytjan Äbdıraiym.
Nūrislam QŪSPANǦALİ
