AIDYN ARMAN SAPARYNAN ORALDY
Qazaq ǧaryşkerı Aidyn Aiymbetov pen onyŋ serıktesterı – reseilık ǧaryşker Gennadii Padalka men daniialyq astronavt Andreas Mogensen ǧaryştaǧy on kündık saparynan aman-esen oraldy. «Soiuz TMA-16M» ǧaryş kemesınen bölınıp şyqqan kapsula Jezqazǧan qalasynan oŋtüstık şyǧysyndaǧy 146 şaqyrymdyq qaşyqtyqqa qondy. Artynşa Astana halyqaralyq äuejaiynan ǧaryşkerlerdı Memleket basşysy Nūrsūltan Nazarbaev qarsy aldy.
Toqtar men Talǧat aǧalarynyŋ jolyn jalǧaǧan Aidyn Aiymbetov – ūltymyzdan şyqqan üşınşı ǧaryşker. Endı Aidyndy arman saparyna attandyrǧan Qazaqstandy ǧaryştyq derjavalardyŋ qataryna äbden qosuǧa bolatyndai. Arnaiy ūiymdastyrylǧan baspasöz mäslihatynda ony Elbasynyŋ özı atap öttı.
Älemdegı 200 memlekettıŋ arasynda ǧaryşqa öz azamattaryn sanauly ǧana el ūşyrǧanyn, solardyŋ ışınde mūndai mümkındıktı qalt jıbermegen Qazaqstan üş bırdei ǧaryşkerıne jetı qat köktegı ǧajaiyp tırşılıktı tamaşalauǧa būiyrtqanyn aitqan Elbasy jerımızde «Baiqoŋyr» ǧaryş ailaǧynyŋ ornalasuy būǧan bırden-bır sebep bolyp otyrǧanyn jetkızdı.
Aitpaqşy, atalmyş ailaq qūrylysynyŋ bastalǧanyna biyl 60 jyl tolyp otyr. Osyny eske salǧan Memleket basşysy būl mereitoi men Aidyn Aiymbetovtyŋ ǧaryşqa samǧauynyŋ qatar keluın el tarihyndaǧy aişyqty uaqiǧaǧa balady.
Ärine, Aidyn Aiymbetov ǧaryşqa äşeiın qydyryp barǧan joq. Oǧan bırqatar zertteu jūmystaryn jürgızu jükteldı. Sony ol abyroimen atqaryp şyqty. Būl tūrǧydan alǧanda, osy saparǧa Qazaqstan tarapynan jūmsalǧan qarjy tolyǧymen aqtalady. Bylai dep Elbasynyŋ özı sendırıp otyr.
Baspasöz mäslihaty barysynda ǧaryşkerımız Halyqaralyq ǧaryş stansasynda Qazaqstan atynan ökıldık etu märtebesın senıp tapsyrǧany üşın Memleket basşysyna jäne Qazaqstan halqyna alǧysyn aita kele, taǧy ǧaryşqa adam jıberu kerek bolsa, daiyn ekendıgın jetkızdı. Nesı bar, Talǧat Mūsabaev üş ret ūşty. Aidynnyŋ da aldynǧy aǧasy körsetken körsetkıştı eŋseruıne tılekşımız.
Amanǧali QALJANOV