Äiel deputatty äleumettık mäsele köbırek alaŋdatady
Qaraqat Äbden – belsendı deputattardyŋ bırı. Toǧyz aidyŋ ışınde ol bırşama ıster atqaryp ülgergen. Bır ǧana mysal, juyrda deputat hanymnyŋ arqasynda bes jyldan berı köterılmei kele jatqan mektepke deiıngı jekemenşık mekemelerdı dotasiialau mäselesı köterıldı. Sonymen qatar, osyǧan deiın 18 ärtürlı basşylyqqa deputattyq saual jıberılgen.
Keiıpkerımız bırınşıden deputat, süiıktı jar jäne ǧalym ekonomika ǧylymynyŋ kandidaty. «Jalpy, adam tek tabys tabudy ǧana oilamau kerek. Ana retınde oilanatyn deputat bolǧym keledı. Mäselen, men – üş balanyŋ anasymyn. Kün saiyn ainalamnan neşe türlı mäselenı köremın. Bız tıl, tıl deimız de, bıraq naqty eşteŋe bere almaimyz. Bır kezderı qazaq tılındegı ertegılerdı balalaryma tauyp beru mūŋ bolatyn. Qazır būl mäsele rettelıp keledı. Osyǧan orai, aǧylşyn, qazaq tılın jüielı oqytuǧa bailanysty ūsynystarym bar. Onyŋ üstıne, deputattardyŋ denı – er azamattar. Al äleumettık mäselelerdı kım şeşedı? Ärine, deputattardyŋ arasynda aqyldy, jan-jaqty oilaityn azamattar köp. Dese de, äiel zatynyŋ jaǧdaiyn tek äiel ǧana bıledı. Äiel ne aituy mümkın? Ol otbasy men balasy turaly, densaulyq pen bılım, mädeniet pen moral jaiynda aitady. Sondyqtan maǧan senım artqan eken, demek, men eŋ bastysy otbasy, balalar, äiel taqyrybyn köbırek qauzaimyn. Bıraq, halyq qalaulysy bolǧannan keiın bır ǧana närsemen şektelıp qaluǧa bolmaidy. Deputat jan-jaqty boluǧa, ainalasyndaǧy barlyq mäselenı köre bıluge mındettı. Mūnyŋ aldynda 12 jyl Qarjy ministrlıgınde, salyq salasynda eŋbek ettım. Osy täjıribemnıŋ bärı jūmys barysynda kömegın tigızıp, atalǧan mäselege jan-jaqty qaraudy üirettı. Jasym ūlǧaiǧan saiyn otbasy, bala turaly azamattyq pozisiiam artyp keledı» deidı Qaraqat Jaqsylyqqyzy.
Qaraqat Äbdennıŋ jūmys üstelınde tūraqty komissiiasynyŋ mäjılısınde qaralatyn Astana qalasynyŋ salauatty ömır saltyn qalyptastyrudyŋ memlekettık saiasatyn ıske asyru jaǧdailary jäne şaralary turaly qūjattar jatyr eken. Sūhbattasuǧa keler aldynda osy qaǧazdarmen mūqiiat tanysyp otyrǧandyǧyn jetkızdı. Iаǧni, qalamyzda ärbır aulada vorkaut trenajer alaŋdary köptep salynsa tiımdı bolatynyn aitty. Ol bırınşıden arzanǧa tüsse, ekınşıden jas ta, jasamys ta qalauynşa sportpen şūǧyldana alady.
Juyrda deputat Q.Äbdennıŋ qabyldauyna jalǧyzbasty äiel kelgen eken. Ol küieuınen ajyrasyp ketkendıgın jäne ekı balasy üşın materialdyq kömek alǧysy keletının aitypty. Alǧaşynda Qaraqat Jaqsylyqqyzy är äiel otbasyn saqtap qaluǧa mındettı ekendıgın bıldırdı. Söilese kele älgı kelınşektıŋ ülken balasy autizmmen auyratyny, küieuı sol üşın tastap ketkendıgı belgılı bolady. Al ekınşı balasyn balabaqşaǧa ornalastyra almai jür eken. Sodan deputat hanym ülken balasyn oŋaltu ortalyǧynda ötıp ketken kezegın qaita qalpyna keltırtkızıp, kışı balasyn käsıpker qūrbysyna ötınış jasap, jekemenşık balabaqşaǧa tegın ornalastyrady.
Äŋgıme barysynda deputat Qaraqat Äbden elordada mügedek balalarǧa arnalǧan memlekettık oŋaltu ortalyqtary köptep salynu kerektıgın aitty. Sebebı, Astanadaǧy bar ortalyq jekenıŋ qolynda körınedı.
Deputat üşın Astana qalasynda jas qyzdardyŋ tärbiesı öte özektı. Ol – «Qazaq qyzy» qoǧamdyq bırlestıgınıŋ töraiymy, «Qazaq Qyzy» mädeni-inabattylyq qyzdar institutynyŋ avtory jäne qūryltaişysy. Būryn «Qazaq qyzy» mädeni-inabattylyq qyzdar institutynda jetım jäne köpbalaly analardyŋ qyzdary da bılım alsa eken dep armandaǧan eken. Sol nietı äkımdıktıŋ qoldauymen mamyr aiynda jüzege asyp, äleumettık az qamtylǧan otbasylardyŋ, köp balaly otbasylardyŋ qyzdary institutta bılım alyp jatyr.
Deputattyŋ äleumettık jelıler – «Feisbuk» pen «İnstagramda» paraqşasy bar. Sailauşylarymen ärkez bailanysta. «Maǧan tek bır ǧana närse jetpeidı – ol uaqyt. 24 saǧat maǧan az. Osy uaqytymdy paidaly ıske jūmsaǧanymdy jön köremın. Jūmysymnyŋ nätijesın körsem, özımdı baqytty sezınemın» deidı deputat.
Jansaia SYDYQBAI