Qala äkımdıgı men QR Memlekettık qyzmet ısterı jäne sybailas jemqorlyqqa qarsy ıs-qimyl agenttıgınıŋ «Astana – adaldyq alaŋy» jaŋa jobasy aiasynda astanalyq №10 emhanada kezdesu öttı.
Joba keŋsesınıŋ jetekşısı Jazira Jylqyşieva medisina qyzmetkerlerınıŋ aldynda söz söiledı. Ol jobanyŋ maqsaty men müddesı jaiyn tüsındırıp, jobanyŋ, eŋ aldymen, tūrmysta kezdesetın jemqorlyqtyŋ jolyn kesuge baǧyttalǧanyn aitty. Ol üşın elordanyŋ barlyq memlekettık mekemelerı men ūjymdaryndaǧy äkımşılık kedergıler joiylyp, adamdardyŋ ömır süruıne qolaily orta jasaudyŋ ülesı zor. Ony qala emhanalarynyŋ bırınde tüsırılgen rolik arqyly körsetıp, emhanadaǧy qyzmettıŋ dūrys ūiymdastyrylmauy saldarynan oryn alǧan keleŋsız jaittardy taldap körsettı.
«Densaulyq saqtau mekemelerıne keluşılerdıŋ köp ekenın bılemız, sol sebeptı bızdıŋ bırınşı mındetımız – medisinalyq qyzmettı aluda qolaily orta jasau. Bızdıŋ jūmys tobymyz barlyq emhanalarǧa inspeksiia jürgızıp jatyr, onda elektrondy kezektıŋ bar-joǧyn tekseremız, otyratyn oryndyqtar jetkılıktı me, kondisioner, bahilge arnalǧan avtomat, tırkeu jūmysy, koll-ortalyq pen basqa da mekemenıŋ jūmystaryna jalpy taldau jürgızemız» dedı baiandamaşy.
«Astana – adaldyq alaŋy» jobasy aiasynda auqymdy qoǧamdyq baqylau engızu josparlandy. Nätijesınde sapaly medisinalyq qyzmet alu da qoljetımdı bola tüsedı.
