Alaştan än ozdyrǧan

Biyl Qazaqstannyŋ eŋbek sıŋırgen ärtısı, «Jastar» syilyǧynyŋ iegerı, talantty änşı, jazuşy, marqūm Jänıbek Kärmenovtıŋ tuǧanyna jetpıs jyl toldy. Soǧan orai elordadaǧy Qazaq ūlttyq öner universitetınde «Jänıbektıŋ än mūrasy» atty eske alu keşı öttı. Oǧan aituly azamattyŋ jary Toty Baigenqyzy, qaryndasy Kenjegül jäne änşımen ömırde jaqyn syilasqan dostary, şäkırtterı qatysty.Kömeiıne būlbūl qonǧan düldül änşınıŋ ömırden ötkenıne otyz jylǧa juyqtap qalypty. «Atqan oqtai, şapqan attai» zymyrap bara jatqan uaqyt. Ol kısı qamşynyŋ sabyndai qysqa ǧūmyr keşse de, halqynyŋ jüregınde mäŋgı qaldy. Qazaq än önerınıŋ düldülı Jüsıpbek Elebekovtıŋ şäkırtı atanyp, batasyn alǧan änşınıŋ aty qūlyn kezınen şyqty. Jüsekeŋ ekı şäkırtı – Jänıbek pen Qairatty (Baibosynov) «telqoŋyrym» dep erkeletedı eken. Jänıbek aǧamyz – aituly änşı ǧana emes, ūlt mūrasynyŋ joqşysy ärı qalamy jorǧa qalamger. Joǧary oqu ornyn bıtırgennen keiın «Öner» baspasynda qyzmet ete jürıp, şyǧarmaşylyqqa den qoiyp, «Aqylbaidyŋ änı», «Ǧaşyqtyŋ tılı», «Mahabbat änı» degen prozalyq kıtap jazdy. Jäne halyq kompozitorlarynyŋ ömırı men mūrasyn därıptep, olardyŋ ūmytyla bastaǧan än sözderın qalpyna keltıruge eŋbek sıŋırdı. Seksenınşı jyldardyŋ ortasynda qazaq teledidarynan etnograf-ǧalym Aqseleu Seidımbek ekeuı änşılık dästür jaiynda habar jürgızıp, tamyry tartyla bastaǧan ūlttyq önerımızge qan jügırttı. Sondai-aq Qūrmanǧazy atyndaǧy konservatoriianyŋ halyq änderı kafedrasyn basqaryp, daryndy şäkırt tärbieledı. Mıne, qysqa ǧūmyrynda osynşama qyruar eŋbek etıp, öşpes ız qaldyrǧan ardaqty tūlǧanyŋ toiy tuǧan jerı – Abai elınen bastalyp, elordada jalǧasyn tapty.
Keş barysynda Qazaq ūlttyq öner universitetınıŋ rektory, älem ärtısı Aiman Mūsaqojeva änşımen bırge talai el ışınde gastroldık saparda bolǧan kezderınen äŋgıme örbıtıp, sahnaǧa aǧamyzdyŋ zaiyby Toty men qaryndasy Kenjegüldı şaqyryp, syi-siiapat körsettı. Toty apai da jinalǧan qauym men osy keştı ötkızudıŋ basy-qasynda jürgenderge rizaşylyǧyn bıldırdı. Odan keiın önerde de, ömırde syŋary bolǧan Memlekettık syilyqtyŋ laureaty Qairat Baibosynov dosy turaly estelık aitty.
– Jänıbekpen bırge oqyp, bırge jürıp, bırge än saldym. Bır ūstazdan därıs aldyq. Osynyŋ bärı keşe ǧana bolǧan sekıldı körınedı. Jäkeŋ qyryq ekı jasynda mezgılsız ömırden öttı. Bıraq sodan berı Jänıbektı onyŋ dostary auzynan tastamai aityp jürse, şäkırtterı änderın şyrqap jür. Sonyŋ bärı jüregıme quanyş ūialatady. Ol zamanynyŋ oza şapqan dara änşısı bolyp şyqty. Būl – jalǧan madaqtau emes, aqiqat söz, – dedı ol.
Keşke Jänıbek Kärmenovtıŋ aldyn körıp, sodan tälım alǧan dästürlı önerdıŋ talantty ökılderı Aitbek Nyǧyzbaev, Nūrai Tanabaev, Gülmira Sarinalarmen bırge Erlan Rysqali, Erbolat Şaldybekov, Klara Tölenbaeva, Aigül Elşıbaeva, Ardaq Balajanova jäne t. b. el tanityn önerpazdar qatysyp, änşınıŋ közı tırısınde aitqan şyǧarmalaryn oryndap, jūrtşylyqqa ruhani läzzat syilady. Sonymen bırge Qazaq ūlttyq öner universitetınen Jänıbek Kärmenovtıŋ synyby aşyldy. Alaştan än ozdyrǧan azamattyŋ ekınşı ömırı osylai jalǧasyp barady.