Bükılälemdık turistık ūiymnyŋ (IýNVTO) qala turizmın damytuǧa arnalǧan halyqaralyq VIII sammitı 2019 jyly elordada ötetın boldy. Būl turaly Koreia astanasy Seulde ötıp jatqan halyqaralyq forumda kezektı basqosu Astanada ötetındıgı resmi türde jariialandy. Atalmyş jiynǧa qala äkımınıŋ orynbasary Ermek Amanşaev bastaǧan delegasiia qatysty.
Biylǧy şaraǧa älemnıŋ 57 elınen myŋdaǧan qatysuşylar kelgen. Olardyŋ qatarynda Grekiia jäne Moŋǧoliia elderınıŋ turizm ministrlerı, Tailand pen Malaiziianyŋ turizm jönındegı vise-ministrlerı, Seul, Kuala-Lumpur, Parij jäne Nissa qalalarynyŋ vise-merlerı, sondai-aq akademiialyq toptardyŋ jäne Google, MasterCard, Amadeus kompaniialarynyŋ ökılderı bar. Şara barysynda BŪŪ qabyldaǧan HABITAT III New Urban Agenda strategiiasy aiasynda qalalyq turizmdı damytudaǧy kökeikestı mäseleler köterılgen. Sonymen qatar qalalyq turizmdı damytudaǧy innovasiialyq jaŋa trendter men sifrlyq tehnologiialar mümkındıgı jäne turizm salasyndaǧy biznestıŋ jaŋa modelderın transformasiialau joldary keŋınen talqyǧa tüstı. Mamandardyŋ aituynşa, 2050 jylǧa qarai älem elderınıŋ 70%-y qala tūrǧyndary bolmaq. Al turizm öz kezegınde düniejüzılık JIÖ-nıŋ 10%-dan astamyn qūrap, qazırgı zamanǧy jahandyq mäselelerdı şeşu men qalalardyŋ ekonomikalyq damuynyŋ negızgı draiverıne ainalmaq.
