Apta basynda EKSPO qalaşyǧyndaǧy NOMAD city hall-da äleumettık qorǧau jüiesı qyzmetkerlerınıŋ künıne orai saltanatty jiyn öttı. Nur Otan partiiasynyŋ qalalyq filialynyŋ qoldauymen ötken şara barysynda Nūr-Sūltan qalasynyŋ «Äleumettık qorǧau jüiesınıŋ üzdıgı» baiqauynyŋ jeŋımpazdary marapattaldy.
Jiyndy Nūr-Sūltan qalalyq mäslihatynyŋ hatşysy Erlan Kanalimov alǧy sözımen aşty.
– Äleumettık qorǧau jüiesı qyzmetkerlerınıŋ käsıbi merekesın atap ötu bastamasy osydan tura 10 jyl būryn qolǧa alyndy. Elbasynyŋ 2011 jylǧy qazandaǧy Jarlyǧymen äleumettık qorǧau jüiesı qyzmetkerlerınıŋ künı resmi bekıtıldı. Būl – adamgerşılıktı tu etken käsıp ökılderınıŋ eren eŋbegın eskerıp, qūrmet körsetudıŋ belgısı. Sala mamandary qaşan da ömırdıŋ qiyndyǧymen betpe-bet kelgen türlı taǧdyr iesıne janaşyrlyq tanytyp keledı. Olar qai kezde bolmasyn jetım jäne erekşe qajettılıgı bar balalarǧa, köpbalaly analarǧa, jalǧyzbasty qarttarǧa kömek körsetuge daiyn.
Qazırgı taŋda Nūr-Sūltan qalasynda 2 myŋnan astam äleumettık qorǧau jüiesınıŋ qyzmetkerı kömekke mūqtaj 150 myŋdai azamatqa qyzmet körsetude.
Qoǧamnyŋ tūraqty damuy azamattardyŋ äleumettık qorǧaluyna bailanysty. Būl tūrǧydan alyp qaraǧanda elordalyq äleumettık sala qyzmetkerlerı memleket pen qoldaudy qajet etetın azamattar arasyndaǧy däneker bolyp keledı, – dedı E.Kanalimov.
Mūnan soŋ ol äleumettık qorǧau jüiesınıŋ bır top qyzmetkerın qala äkımınıŋ Qūrmet gramotasymen jäne qalalyq mäslihat hatşysynyŋ, qala äkımı orynbasarynyŋ alǧys hattarymen marapattady.
Nur Otan partiiasynyŋ qalalyq filialy töraǧasynyŋ bırınşı orynbasary Saqtaǧan Säduaqasov ta sala mamandaryn bas partiia atynan käsıbi merekemen qūttyqtap, qalalyq «Äleumettık qorǧau jüiesınıŋ üzdıgı» baiqauynyŋ jeŋımpazdarynyŋ esımın jariialady.
[smartslider3 slider=685]
Konkurstyq komissiianyŋ şeşımımen «Äleumettık qorǧau salasyndaǧy üzdık memlekettık qyzmetşı» atalymy boiynşa Saryarqa audandyq äleumettık tölemder bölımınıŋ basşysy Saltanat Stanbaeva marapattaldy. «Äleumettık qorǧau salasyndaǧy üzdık azamattyq qyzmetker» ataǧy «Nūrly jürek» äleumettık qyzmet körsetu ortalyǧynyŋ dene şynyqtyru pänınıŋ mūǧalımı Klara İmenalinovaǧa būiyrdy. «Şarapat» äleumettık qyzmet körsetu ortalyǧynyŋ qyzmetkerı Tanşolpan Baiekenova «Üzdık äleumettık qyzmetker» atandy. «Üzdık äleumettık qorǧau mekemesı» atalymynda «Qamqor» äleumettık qyzmet körsetu ortalyǧy üzdık şyqty. «Üzdık äleumettık ükımettık emes ūiym» ataǧyn Äsel Jasan jetekşılık jasaityn «Balam-ai» mügedek balalardy qoldau qaiyrymdylyq qory enşıledı. «Üzdık aqparattyq jūmys» arnaiy ataǧyna «Janūia» otbasy institutyn qoldau ortalyǧy ielık ettı.
Jeŋımpazdarǧa diplomdarmen bırge baǧaly syilyqtar tabystady. Äleumettık qorǧau jüiesı qyzmetkerlerın «Qyzmet» memlekettık, bank mekemelerı jäne qoǧamdyq qyzmet körsetu qyzmetkerlerınıŋ salalyq käsıpodaǧy da qūttyqtap, ūiym atynan jekelegen azamattarǧa qūrmet körsettı.
Jiyn soŋy estrada jūldyzdary men elordalyq öner ūjymdarynyŋ konserttık baǧdarlamasyna jalǧasty.
