«Altyn tūlpar» aimaqta öttı
Jyl saiyn elorda törınde ötetın «Altyn tūlpar» turnirı biyl alǧaş ret aimaqta ötkızıldı. Būl joly ūlttyq sporttyŋ bäsekesı Atyraudyŋ tösın bır dübırlettı.
Qazaqstan Respublikasy Ūlttyq sport qauymdastyǧy men Atyrau oblysy äkımdıgı jäne Ūlttyq sport qauymdastyǧynyŋ Atyrau oblystyq filialynyŋ ūiymdastyruymen besınşı märte ūiymdastyrylǧan 51 şaqyrymdyq alaman jarysta on ekı öŋırdıŋ qyryqqa juyq jüirıgı baq synady. Nur Otan partiiasy men QR Mädeniet jäne sport ministrlıgınıŋ qoldauymen ötken bäigenıŋ bas jüldesı 10 mln teŋge boldy. Al 9 atqa jülde bergen saiystyŋ jalpy jülde qory 22 mln teŋgenı qūrady.
2017 jylǧy «Altyn tūlparda» Tarazdyŋ tūlpary «Samaldan» arqan boiy artta kelıp, ekınşı oryndy ielengen Jetısudyŋ jüirıgı «Qoianqasqany» arada ekı jyl ötkende ielerı Qyzylorda oblysy atynan «Altyn tūlparǧa» taǧy da baptap qosty. «Qoianqasqa» säigülık būl joly naǧyz babynda eken. At iesı Berdıbek Mahanovtyŋ aituynşa, būl jarysqa jüirıktı bır ai boiy Atyrauda arnaiy baptaǧan eken. At bapkerınıŋ eŋbegı aqtalyp, «Qoianqasqa» jarys jolyna şyqqan qyryqqa juyq säigülıkten aldy bolyp, 10 million teŋgelık bas bäigenı oljalap qaitty. Ekınşı oryndy Jambyl oblysynan kelgen Jasūlan Äbdıbekovtıŋ «Şymşyq» atty jetı jastaǧy budan tory biesı ielenıp, 5 million teŋgelık jüldege keneldı. Märe syzyǧyn üşınşı bolyp taǧy bır jambyldyq atbegı Eldos Sūltanbekovtıŋ «Dos» atty säigülıgı kesıp ötıp, 2 mln 500 myŋ teŋge olja aldy.
Sonymen qatar, «Altyn tūlpar – Jaiyq jaǧasynda» alaman bäigesınde taǧy da alty tūlparǧa qarjylai syilyq berıldı.