Elordada 500-den asa qoǧamdyq baqylauşy sailauǧa baqylau jürgızedı. Mūndai jaŋalyqty keşe Jastar saraiyndaǧy brifingte «Amanat» sailauǧa monitoring jürgızu azamattyq platformasy qalalyq ştabynyŋ ökılderı jariia ettı. Basqosuda mälım bolǧandai, elımızdegı 185 qoǧamdyq ūiymdy bırıktıretın «Amanat» platformasy 10 myŋǧa juyq täuelsız baqylauşyny oqytyp, daiyndauǧa kırısken.
Elordadaǧy «Sosium-Zertteu» qoǧamdyq bırlestıgınıŋ jetekşısı Altynai Nūrkeeva «Amanatqa» qosylǧan azamattyq qoǧamnyŋ basty maqsaty – ädıl, aşyq jäne taza sailau ötkızudı qamtamasyz etu ekenın aitady. «Bız, qoǧamdaǧy belsendı azamattar, Nūr-Sūltan qalasyndaǧy azamattyq qoǧamnyŋ ökılderı, «Amanat» sailauǧa monitoring jürgızu azamattyq platformasynyŋ qūryluyn qoldadyq. Bügınge deiın qala boiynşa şamamen 500-den astam baqylauşyny oqytyp, daiyndadyq. Olardyŋ jūmysyna «mobildı kapitandar» dep ataǧan 17 üilestıruşımız jetekşılık etedı. Baqylauşylarǧa belgılı bır uchaskeler belgılengen. Bızdıŋ täuelsız baqylauşylarymyz sailau ötetın künı ekı auysymmen (05-45-ten 14-00-ge deiın, 14.00-den 22.00-ge deiın) jūmys ısteidı. Är baqylauşy sailau uchaskesı aşylǧan uaqyttan bastap jabylǧanǧa deiıngı barlyq üderıske qatysady. Olar arnaiy anketa toltyrady» dep tüsındırdı A.Nūrkeeva.
Qoǧamdyq bırlestık jetekşısınıŋ aituynşa, zaŋ būzuşylyqtar anyqtalǧan kezde baqylauşylar dereu uchaskelık komissiia töraǧasyna habarlaidy. Asa erekşe zaŋ būzuşylyq oryn alǧanda nemese sol zaŋ būzuşylyqqa komissiia müşelerı jol bergende ne komissiia töraǧasynyŋ qatysy bolǧan jaǧdaida qalalyq ştabqa, odan ärı respublikalyq ştabqa jetkızedı. Sol oqiǧa turaly ekı dana aktı toltyrady. Qūjatty özınen bölek ekı baqylauşy ne sailauşy rastap, qol qoiady. Sondai-aq Altynai Nūrkeeva «Amanattyŋ» baqylauşylary bükıl qala aumaǧyn qamtyp, şalǧai kentterdegı uchaskelerge de baratynyn mälım ettı.
«Baqylauşylardyŋ mındetı – sailau üderısıne baqylau jäne taldau jürgızu. Ärbır baqylauşy jūmysqa kelgende arnaiy anketa toltyrady. Ol jerde sailau uchaskesınıŋ aşyluyna, dauys beru barysyna, dauystardy sanauǧa qatysty bırneşe sūraqqa jauap beredı. Bızdıŋ baqylauşylarymyz sailau komissiialarynyŋ jūmysyna sebepsız kilıkpeidı» dedı A.Nūrkeeva.
«Amanat» platformasynyŋ qalalyq ştaby jetekşısı Asylbek Äbdıräşitovtıŋ aituynşa, sailaudyŋ ädıl jäne aşyq ötuıne müddelı Qazaqstan azamattarynyŋ «Amanat» täuelsız erıktı qauymdastyǧyn qūruǧa elımızdegı 260 qoǧamdyq oidyŋ köşbasşysy qoldau bıldırgen. Onyŋ aituynşa, azamattyq platformany qūru bastamasyn elımızdegı – 260, al elordamyzdaǧy 50-ge juyq qoǧamdyq oidyŋ köşbasşysy qoldady. Sonyŋ ışınde Mūrat Äbenov, Mūsaǧali Duambekov siiaqty elge tanymal 15-ke juyq tūlǧa bar.
Ol «Amanat – azamattyq platformasy» atty jobany bas qaladaǧy 52 qoǧamdyq bırlestık, 500-den astam belsendı azamat qoldap, sailau künı barlyq 204 uchaskege baqylau jürgızuge kömektesetının jetkızdı. «Nūr-Sūltan qalasynda 204 aşyq sailau uchaskesı bar, solarǧa bızdıŋ 408 baqylauşymyz barady. Būǧan qosa, taǧy 93 adamdy rezervke qoidyq. Öitkenı sailau ötetın künı baqylauşylardyŋ bırı syrqattanyp qalsa nemese belgılı bır sebeptermen kele almai qalatyn bolsa, rezervtegı adamdarmen auystyramyz. Iаǧni, aldaǧy uaqytta tuyndaityn problemalardyŋ barlyǧy aldyn ala qarastyrylyp qoiǧan. Bızdıŋ baqylauşylardyŋ ülestık salmaǧyna keletın bolsaq, 69 paiyzy – äielder, 31 paiyzy – er-azamattar, 30,6 paiyzy – jastar, 20,3 paiyzy – zeinetkerler, 49,1 paiyzy – orta jastaǧy adamdar» dedı ol atalǧan jiynda.
Erıktı qauymdastyq ökılderı sailau uchaskelerınıŋ infraqūrylymyn tekserıp, ol jerde aua baptaǧyştardyŋ, mügedekterdıŋ jürıp-tūruyna yŋǧaily pandustardyŋ boluyna erekşe nazar audarady.
