Elbasy dombyra men garmoşka aspabynda jaqsy oinaidy. Dombyramen än aitqanda qūlaqtyŋ qūryşyn qandyrady. Tūŋǧyş Prezident Nūrsūltan Nazarbaevpen talai märte än salyp, tıptı beiresmi türde onyŋ jeke konsertmeisterı atanu – men üşın ülken qūrmet. Eŋ bırınşı tanysqanymyzda 2 saǧat boiy aiaqtan tık tūryp, salmaǧy 11 kelılık baiandy asynyp än saldym. Bıraq müldem şarşamadym. Kerısınşe, şabyttana tüstım. Onyŋ sebebı Elbasynyŋ aldynda bırge öner körsetkennen bolar. Öz basym qobaljyǧan joqpyn, bıraq ūiymdastyruşylar tarapynan «olai etpe, būlai ısteme, ändı basqaşa orynda» degen siiaqty eskertpeler köp aitylatyn, al özı erkındıktı erekşe baǧalaidy. Bır än oryndap bolǧan soŋ Elbasy maǧan taǧy bır än aituymdy sūrady. Ekınşı änım aiaqtalǧan soŋ üşınşısın oryndadym. Odan keiın bır uaqytta ol kısı «Baspadym jardyŋ şetın qūlai ma dep…» dep şyrqai jöneldı. Men de qosyla kettım. Sodan soŋ ol kısı tılegın aityp, söz söilep tūryp, menı körıp qalsa, bır ändı şyrqai jöneledı. Sodan bır uaqytta «Atyŋ kım? Qaida ısteisıŋ?» dep sūrady. Qazaq teatrynda bas hormeister ekenımdı aittym. «Äzırbaijan Mämbetovte ekensıŋ ǧoi» dedı. Sodan Qaraǧandy oblysy Aqtoǧai audanynda tuyp-öskenımdı aittym. Artynşa kömekşılerı telefon nömırımdı jazyp aldy. Sodan bastap Elbasynyŋ aldynda jiı öner körsetetın boldym. Baianym da kölıgımde jüretın boldy.
Tanystyqtan keiın kelesı kezdeskende Elbasynyŋ «Amantai, qalaisyŋ?» dep hal-jaǧdai sūrasqany bar. Özımız bır körgen adamdy ekınşı ret eske tüsıre almai, «esımıŋ kım edı?» dep sūrap jatamyz. Ol menıŋ esımımdı ūmytpaǧan eken. Sonymen qatar ol kısı demalysqa şyqqanda saiasat turaly bır auyz söz qozǧamaidy. Uaqytty uysynda ūstaidy, demalys uaqytynda şynaiy demalady. 8 nauryz – Halyqaralyq äielder künıne arnalǧan jiynda tek sol taqyrypqa sai änderdı aituymdy qalaityn. Bırde taqyrypqa sai emes ändı aityp bastap edım, sonda ol aqyryn toqtatyp, ana turaly, mahabbat, näzıktık jaiynda özı ändetıp kettı. Jalpy öte talǧampaz tyŋdarman. Būl kısınıŋ tūla boiynda jasandylyq joq. Köŋılınde tūrǧan sözdı aityp salatyny taǧy bar. Elbasymen aramyzdaǧy altyn köpır – än.
Elbasynyŋ qoşemetıne, syi-siiapatyna bölengen men baqyttymyn. Sonyŋ ışınde men üşın eŋ qūrmettısı – özı tartu etken aq baian. 2006 jyly 8 nauryzda Burabaiǧa bardyq. Ol kısı saiatşylyqty jaqsy köredı ǧoi, atqa şauyp än aitatyn bolsam, suyqqa tözımdısın alamyn. Al ǧimarat ışınde bolsa, dauysy jaqsy şyǧatyn, ädemısın taŋdaimyn. Ūiymdastyruşylar merekelık keştıŋ qandai formatta ötetının eskertpedı. Sodan ǧimarat ışınde dauysy jaqsy şyǧatyn baianymdy alyp şyqtym. Elbasynyŋ aldynda öner körsettım, özı de qosylyp än şyrqady. Odan soŋ ūiymdastyruşylar dalaǧa şyǧyp öner körsetuımdı sūrady. «Baianym suyqqa şydamaidy, dauysy şyqpai qalady» desem, ony eskeretın olar joq. Aqyry baianymdy alyp Elbasynyŋ janyna jaqyndadym da, änımdı bastap kettım. Al baianym suyqtan qatty da qaldy. Dauysy aqyryn şyǧyp, şyŋyl estılıp tūrdy. Sonda Elbasy: «Amantai, nege aqyryn oinap tūrsyŋ?» dedı. Men ǧimarattyŋ ışınde oinaityn baianymdy alyp kelgenımdı aittym. Sol sätte Elbasy jan-jaǧyna qarap: «Amantaidyŋ jaǧdaiyna qarap jürseŋderşı. Amantaiǧa bır baian alyp beru kerek» dedı. Sodan jarty ai öter-ötpes uaqyttan keiın Germaniiadan äkelıngen su jaŋa baian qolyma tidı. Baspanaly boluym da Elbasynyŋ arqasy dep bılemın. QR eŋbek sıŋırgen qairatkerı ataǧyna özı ūsyndy, qanatynyŋ astyna alyp jüretın. Onysyn önerge degen riiasyz mahabbaty dep bılemın.
Amantai JŪMAŞEV,
QR eŋbek sıŋırgen qairatkerı,
Qalibek Quanyşbaev atyndaǧy
Memlekettık akademiialyq
qazaq muzykalyq-drama
teatrynyŋ bas hormeisterı
