Otandyq bır top fototılşı «Kielı Altai» respublikalyq blog-turyna qatysyp, Şyǧys Qazaqstan oblysy Qatonqaraǧai audanynyŋ tūmsa tabiǧaty men tarihi oryndaryn taspaǧa tüsırdı.
– Biyl Qazaqstanda Jastar jyly dep jariialanǧan bolatyn. Atalǧan ekspedisiia da sonyŋ aiasynda ūiymdastyryldy. Qatysuşylardyŋ köpşılıgı – jas fotograftar. Olar tüsırgen Şyǧys Qazaqstannyŋ tıl jetkısız tamaşa sūlulyǧyn paş etetın suretter keiın respublika boiynşa türlı körmelerge qoiylady, būl otandyq turizmdı damytuǧa ülken sep bolady dep oilaimyn, – dedı ıs-şarany ūiymdastyruşylardyŋ bırı, «Fotoöner» qoǧamdyq bırlestıgınıŋ töraǧasy Asylhan Äbdıraiym.
Blog-tur barysynda National Geographic Qazaqstan jurnalynyŋ şef-fotografy Erbolat Şadrahov jäne ardager fototılşı Nūrmanbet Qizatūly sekıldı käsıbi fotograftar jas ärıptesterıne arnap şeberlık synyptaryn da ötkızdı.
Qatonqaraǧai audany aumaǧyndaǧy saq däuırınen saqtalǧan Berel qorymy ata-babalarymyzdyŋ tūrmys-tırşılıgınen syr şertıp, köne zamandarǧa jeteleidı. Üş qorǧannan tūratyn būl qorym – Qazaqstannyŋ jalpyūlttyq kielı oryndary kartasyna engen qasiettı meken. Myŋjyldyqtar tarihyn arqalaǧan qorǧandardy zertteu HIH ǧasyrdyŋ orta şenınde bastalyp, künı bügınge deiın jalǧasyp jatyr. Keiıngı jyldary qorymdy belgılı arheolog Zeinolla Samaşev ındete zerttedı. Oljasyz da emes. Sonyŋ ışınde №10 obadan ertteulı attardyŋ süiekterı, at äbzelderı tabyldy.
