ARDAGERLER ARDAQTALDY
Ūly Jeŋıstıŋ 70 jyldyǧy qarsaŋynda qalalyq ardagerler keŋesınıŋ ūiymdastyruymen Almaty audany aumaǧyndaǧy «Aidar» şaǧyn ortalyǧynda soǧys jäne eŋbek ardagerlerımen kezdesu öttı.
Atalmyş şaraǧa qalalyq mäslihattyŋ deputaty Qarşyǧa Qūlmūqanov, qalalyq ardagerler keŋesınıŋ töraǧasy Amankeldı Syzdyqov, Almaty audandyq ardagerler keŋesınıŋ töraǧasy Sailaubek Baibolov qatysyp, söz söiledı.
– Bügıngı ūrpaqtyŋ baqytty bolaşaǧy men beibıt ömırı jolynda qan maidanda jaumen betpe-bet soǧysyp, keudesın oqqa tösep, erlık ülgılerın körsetken atalar esımı eşqaşan da ūmytylmaidy. El täuelsızdıgıne de sızderdıŋ eren eŋbekterıŋız ben yntymaq, bırlıktıŋ arqasynda qol jetkızdık. Sol üşın, Sızderge myŋ alǧys! – dedı A.Syzdyqov.
Brusilovskii köşesındegı 2-üide ornalasqan «Aidar» şaǧyn ortalyǧynda osynda tūratyn ardagerlerdıŋ bos uaqyttaryn tiımdı ötkızuge barlyq jaǧdai qarastyrylǧan. Olar mūnda şahmat,
doiby oinap, gazet-jurnaldar oqidy. Sondyqtan da qoly bos ardagerler kün saiyn ortalyqqa asyǧady.
Kezdesuge kelgen soǧys ardagerlerı Äubäkır Uäliev, Äbdırahman Saparov qan maidandaǧy qyrǧyn turaly äŋgımelei kele, özderın osyndai qamqorlyqqa bölep, ünemı kömek qolyn sozyp, qūrmet körsetıp kele jatqan azamattarǧa alǧystaryn jetkızdı.
Atalmyş şaraǧa Almaty audanynda tūratyn jiyrma bır maidanger, sonymen bırge eŋbek ardagerlerı men tyl eŋbekkerlerı – barlyǧy jetpıs adam şaqyrylypty. Keş soŋynda ūiymdastyruşylar ardager ata-äjelerge syilyqtar tapsyrdy.
Gülbarşyn ÖKEŞQYZY