Futboldan el bırınşılıgınıŋ 30-turynda «Astana» öz alaŋynda Şymkenttıŋ «Ordabasy» komandasymen kezdestı.
Chempiondyqtyŋ esıgın qaǧyp tūrǧan elordalyqtar būl joly qonaqtardyŋ «qaltasyn» tügel qaqpai, bır ūpai ǧana alyp qaldy. Teŋ aiaqtalǧan oiyn golsyz bolmady. Alaida oiynnyŋ körıgın qyzdyrǧan qiyp alyp qaraityn sätter – tek ekınşı taimnyŋ enşısınde.
Eseptı aldymen alaŋ ielerı aşty. 54-minutta Marin Tomasovtyŋ aiyp alaŋynyŋ syrtynan aŋyratyp tepken doby toǧyzdyqqa top ete qaldy. Būl golǧa «Ordabasy» köp ūzamai, araǧa tört minut salyp jauap berdı. Būǧan qonaǧyn syilaǧan «Astananyŋ» qaqpaşysy Aleksandr Mokin «kömektestı». Ol Antonio Rukavinadan keiın qaitqan dopty alysqa attandyramyn dep jaza basty. Dälırek aitqanda, Mokinnıŋ tepken dobyna Jasūlan Moldaqaraev aiaǧyn tosa salyp edı, onysy bos jatqan tordan oryn tapty. Söitıp tarazy basy teŋestı. Jäne būl esep oiyn soŋyna deiın özgerıssız qaldy.
Sonymen, chempiondyqqa asyqpaǧan «Astana» turnir kestesındegı qorjynyna bır ūpai salyp, 71 ettı. Onyŋ bosaŋsyǧanyn paidalanyp, quyp jetuge Almatynyŋ «Qairaty» da asa qūlyqty bola qoimady. «Qairat» öz jerınde Qostanaidyŋ «Tobylymen» oinap, kezdesu golsyz aiaqtaldy. Qalǧan oiyndarǧa da köz jügırtıp ötsek, «Ertıs» «Qaisardan» 0:1, «Şahter» «Aqtöbeden» 0:1 esebımen ūtyldy. Al «Atyrau» «Aqjaiyqty» 2:1 esebımen jeŋse, «Qyzyljar» men «Jetısu» 1:1 esebımen teŋ tarqasty.
