Bırneşe kün būryn «Astana EKSPO-2017» körme keşenı nysandarynyŋ bır bölıgı Husein ben Talal köşesınde ornalasady degen habar taratyldy. Qabanbai batyr daŋǧylymen qiylysatyn būl köşe äuejaiǧa bara jatqan jolda.
Jaqyn künderı atalmyş köşenıŋ resmi türde aşyluy da josparlanuda. Osydan zaŋdy sūraq tuyndaidy – Husein ben Talal degen kım edı, Astanada onyŋ atyna köşe beru mäselesı qaidan şyqqan? Rasymen, oilandyratyn jaǧdai.
Ilgerıde bır dosymyzben Taha Husein köşesınıŋ tūsynda jürıp, «Būl kım edı?» degen sūraqty bır-bırımızge qoidyq. Aqyry, ekeumız de bılmeitın bolyp şyqtyq. İnternettı aqtaryp, ol Mysyr elınıŋ belgılı jazuşysy, ädebiettanuşysy jäne tarihşysy bolǧanyn bıldık.
Al, Husein ben Talal İordaniianyŋ būrynǧy korolı eken. Keibır aqparattyq saittarǧa jügınsek, Mūhammed paiǧambardyŋ 39-ynşy ūrpaǧy, arab elderı arasyndaǧy bailanystardyŋ damuy men Taiau Şyǧys elderındegı şielenısterdı retteuge ülken üles qosqan tūlǧa. 1952 jyldyŋ 11 tamyzynda, 16 jasynda taqqa otyryp, elu jylǧa juyq, dälırek aitsaq, 46 jyl 9 ai boiy dünieden ötkenşe el basqarǧan. İordaniia elınıŋ damuy tıkelei osy esımmen bailanysty eken. Qazır de osy eldı onyŋ balasy Abdalla II ben Husein basqaryp otyr.
Endı Husein ben Talalǧa Astanadan köşe beru mäselesıne keleiık. Tılderdı damytu basqarmasynan alǧan aqparatymyzda bırneşe jyl būryn qalalyq onomastikalyq komissiiaǧa Qazaqstan Respublikasy Syrtqy ıster ministrlıgı Aziia jäne Afrika departamentınıŋ direktory Mūrat Nūrtıleuovten Astana qalasynyŋ bır köşesıne İordaniia korolı Abdalla II ben Huseinnıŋ nemese onyŋ äkesı Husein ben Talaldyŋ esımın beru turaly hat tüskenı körsetılgen. Ötınış 2011 jyldyŋ 30 qaraşasynda qaralyp, Esıl audanynda ornalasqan № 27 jobalau köşesıne Husein ben Talal esımın beru turaly ūsynys qanaǧattandyryldy.
Astana qalasyndaǧy № 27 jobalau köşesıne Husein ben Talal esımın beru jönınde 2012 jylǧy 25 qaŋtarda Astana qalasy äkımınıŋ №80 qaulysy jäne 2012 jylǧy 25 qaŋtarda qalalyq mäslihattyŋ №4/1-V şeşımı qabyldandy. Osydan şamaly uaqyt ötkende Memleket basşysy Nūrsūltan Nazarbaev Abdalla II ben Huseinmen telefonmen söilesıp, ony 50 jyldyq mereitoiymen jäne Astanada onyŋ äkesıne köşe beru şeşımımen qūttyqtaǧan.
Aita ketu kerek, Qazaqstan men İordaniia arasynda saiasi, ekonomikalyq jäne mädeni-gumanitarlyq salalarda berık bailanys ornyqqan. Ekı eldıŋ de laŋkestıkpen küreste jäne Taiau Şyǧysta beibıtşılık ornatuda közqarastary säikes keledı.
Astana men Amman – bauyrlas qalalar. Ekı qala arasyndaǧy sauda-ekonomikalyq, ǧylymi-tehnikalyq jäne gumanitarlyq salalarda qarym-qatynas jaqsy jolǧa qoiylǧan. 2010 jyly Ammandaǧy ortalyq köşelerdıŋ bırıne Elbasy Nūrsūltan Nazarbaev esımı berılıp, aşylu räsımı saltanatty jaǧdaida ötkenı belgılı.
Amanǧali QALJANOV
