Aldaǧy jazdyŋ 27 şilde – 12 tamyz aralyǧynda Ūlybritaniia astanasy Londonda HHH jazǧy Olimpiada oiyndary ötedi. Qazirgi künde älemniŋ eŋ üzdik sportşylary osy jarysqa äzirlik jasau üstinde. El men ūlttyŋ namysy synǧa tüsetin bairaqty bäsekege Qazaqstan saiypqyrandary da qyzu daiyndalyp jatyr. Bügingi künge deiin bizdiŋ eldiŋ 65 sportşysy London oiyndaryna qatysu lisenziiasyn ielenip otyr. Äli de ümit artqan qyz-jigitterimiz joq emes.
London oiyndaryna joldama beretin eki birdei jarys Astana törinde ötetin bolyp otyr. Atap aitqanda, bügin «Däulet» sport kombinatynda grek-rim, erkin jäne äielder küresinen Aziialyq irikteu turniri bastalady. Būl jarysqa osyǧan deiingi älem birinşiliginde joly bolmai, lisenziiaǧa qoly jetpei qalǧan baluandar tügeldei kelip otyr. Bas-aiaǧy 22 eldiŋ ükilep äkelgen baluandary beldesetin bolady.
Qazaq janküieri taqymyn qysyp qoldau körsetetin baluandarymyzǧa kelsek, erkin küreste Aqjürek Taŋatarov (66 keli), Semen Semenov (84 keli) jäne Marid Mutalimov (120 keli) boz kilemde baǧyn synaityn bolsa, grek-rim küresinde Ashat Qūdaibergenov (55 keli), Darhan Baiahmetov (66 keli) jäne Danial Gadjiev (84 keli) joldama üşin talasqa tüsedi. Al äielder küresinde Aiym Äbildina (55 keli) men Elena Şalygina (63 keli) küresetin bolyp otyr.
Baluandar bäsekesi märesine jetisimen taǧy bir tartysty jarysqa kuä bolamyz. 5-12 säuir künderi däl osy «Däulet» sport kombinatynda boksşylar turniri ötetin bolyp otyr. Būl jarysta London oiyndaryna qatysatyn bylǧary qolǧap şeberlerin aiqyndaityn bolady.
Büginde Qazaqstan qūramasynda 6 lisenziia bar. Byltyr Bakude ötken älem chempionatynda 5 boksşymyz joldama alsa, Qanat Abutalipov WSB jüiesi boiynşa ötken älem birinşiliginde chempion atanyp London oiyndaryna da lisenziia ūtyp alǧan bolatyn. Endi tört salmaq boiynşa joldama aluǧa tiispiz. Būl mümkindikti paidalanyp, olimpiada oiyndaryna qatysuǧa joldama jeŋip alu üşin Birjan Jaqyp (49 keli), Iliias Süleimenov (52 keli), Daniiar Eleusinov (64 keli) jäne Vasilii Levit (91 keli) aiqasqa tüsetin bolyp otyr.
Sonymen, elorda törinde jandy küidirip, qandy qyzdyratyn bäsekeler ötpek. Olai bolsa, el namysyn qorǧau üşin synǧa tüsetin qyz-jigitterimizge qoldau bereiik, aǧaiyn!
