Astanadaǧy Täuelsızdık saraiynda Fransuz imperatory Napoleon Bonaparttyŋ ömırı men erlıgıne arnalǧan «Napoleon. Ömır. Aŋyz» atty körme aşyldy.
Körmege 300-ge juyq jädıger, onyŋ ışınde öner tuyndylary, qoljazbalar men Napoleon däuırınıŋ jihazdary qoiylǧan. Olardyŋ barlyǧy sol kezdegı Fransiianyŋ şyǧarmaşylyq, ǧylymi jäne saiasi ömır saltynan syr şertıp, sondai-aq, fransuz imperatory kezındegı azamattyq qoǧamdaǧy özgerısterdı körsetedı.
Körme Fransiianyŋ Qazaqstandaǧy jylynyŋ qorytyndy şarasy retınde ūiymdastyrylyp otyr. Ūiymdastyruşylar qazaqstandyq körermenge Parijden arnaiy äkelıngen Fransiianyŋ baǧa jetpes mädeni qazynalaryn tamaşalauǧa mümkındık berıp otyr.
«Būl zattardyŋ barlyǧy Napoleonnyŋ jeke būiymdary, ol olardy öz qolymen ūstaǧan, kündelıktı ömırınde qoldanǧan. Būl körme sonysymen de qūndy. Bır ökınıştısı onyŋ dauysynyŋ jazbasy joq. Napoleon tek aŋyzǧa ainalǧan tūlǧa ǧana emes, eŋ bastysy et pen süiekten jaratylǧan qarapaim adam bolǧan», – dep atap öttı Fransiianyŋ Qazaqstandaǧy Tötenşe jäne Ökılettı Elşısı Fransis Eten körmenıŋ aşyluyna bailanysty ötken baspasöz mäslihatynda.
«300 jädıgerden tūratyn körme Napoleon qory, Versal, Fontenblo jäne Malmezon qalasyndaǧy Napoleonnyŋ Jozefinamen tūrǧan üiı siiaqty mūrajailardan jinalǧan. Bız osy körmenıŋ däl Astanada aşylǧanyna öte quanyştymyz», – dedı körme kuratory, «Napoleon» qorynyŋ direktory Terri Lens.
Aita ketu kerek, körmenı Ūlttyq mūrajailar bırlestıgı – Ülken sarai jäne «Napoleon» qoǧamdyq qory Fransiianyŋ Qazaqstandaǧy Elşılıgınıŋ bastamasymen, Astana qalasy äkımdıgınıŋ qoldauymen ūiymdastyryp otyr.
Körme 23 aqpanǧa deiın sozylady. Oǧan kelem deuşılerge 21 jeltoqsannan bastap esık aşyq.
Avtor: Äbu-Asqar Mekeşūly
