Jaz boiy jügırıp jattyqqan elorda jūrty Arqanyŋ saryşūnaq aiazynda da qarap jatqan joq. Senbıde synap baǧanasy -25 gradusqa deiın tömen tüsse de, köŋıl küilerı tüspegen marafonşylar Triatlon parkke taŋnan jinalyp, sap tüzedı.
Ekınşı ret saltanat qūrǧan Astana winter marathon jarysyna 1600-den asa adam qatysuǧa niet bıldırdı. Onyŋ arasynda alystan at aryltyp kelgender de bar. Aşyp aitsaq, 300-den asa jelaiaq elımızdıŋ basqa aimaqtarynan jäne Resei men Ukrainadan jettı.
Sportty ömır saltyna ainaldyrǧan köpşılık qabaǧyna qyrau qatsa da būl dodadan qalys qalmady. Jas-kärısıne qaramai osy maŋnan tabylǧan jūrttyŋ eŋ jasy 12 jasar bolsa, eŋ egdesı 74 jasta boldy.
Temır tözımdı, qyzu qandy marafonşylar 5, 10 jäne 21 şaqyrymdyq üş qaşyqtyqta baqtaryn synady. Al eŋ ūzaq 42 şaqyrymdyq jarys künnıŋ qatty suytuyna bailanysty şekteldı. Mūnda qatysuşylardyŋ qauıpsızdıgıne asa män berdı. Äitpese 42 kilometrdı de baǧynbas beles dep bılmeitınder qos ökpesın qolyna alyp daiyn-aq tūr edı. Jelaiaqtardyŋ osy tabandy mınezınen marafonnyŋ ūrany nege «Şeksız mümkındık» dep atalǧany da aiqyn boldy.
Dodaǧa dem berıp, köpke ülgı bolyp Aziia, Afrika, Avstraliia jäne Amerikanyŋ şöl dalasyn şaldyqpai jalǧyz jügırıp ötken äigılı marafonşy Marat Jylanbaevtyŋ özı jol bastady. Ol tek Astanada ǧana emes, Aqtöbe, Atyrau, Pavlodar, Ekıbastūz jäne Oral qalalarynda da jūrt jügıruge şyqqanyn atap ötıp, halyqty belsendı qozǧalysqa ündedı.
Marafon Astana qalasy äkımdıgınıŋ qoldauymen öttı. Şaranyŋ bas demeuşısı – «BI group» kompaniiasy.
5 şaqyrymdyq qaşyqtyqtaǧy marafonda Serık İsmailov pen Adel Şahaidar jeŋıske jetse, 10 şaqyrymdyq qaşyqtyqty alǧaşqy bolyp Miras Jetıbaev pen Zarina Mentaeva baǧyndyrdy. Al 21 şaqyrymdyq marafonda Bazarbai Dautaliev pen Tatiana Mirgorodskaiaǧa teŋ keler atlet bolmady.
